Прэс-службы беларускага і расейскага палітыкаў па-рознаму паведамілі пра іхную тэлефонную размову. Крэмль раскрыў, што Уладзімір Пуцін пажадаў Аляксандру Лукашэнку «поспехаў на выбарах», але беларуская прапаганда пра гэта змаўчала. Палітычны аглядальнік Аляксандр Фрыдман растлумачыў «Белсату», чаму.
Аляксандр Лукашэнка і Уладзімір Пуцін павіншавалі адно аднаго з Вадохрышчам і абмеркавалі «актуальныя працоўныя пытанні двухбаковага ўзаемадзеяння», пагадзіўшыся, што «варта падтрымліваць інтэнсіўнасць беларуска-расейскай супрацы ўва ўсіх сферах». Палітыкі таксама «дамовіліся пра далейшыя кантакты», паведаміла прэс-служба Лукашэнкі.
У Крамлі ж раскрылі яшчэ адну дэталь размовы:
,,«Прэзідэнт Расеі таксама пажадаў Аляксандру Лукашэнку поспехаў на прэзідэнцкіх выбарах, што адбудуцца 26 студзеня».
«Гэта з дыпламатыяй нічога супольнага не мае. Гэта ўмяшанне ў справы іншых краінаў. Бо калі ты зробіш такія заявы, ты парушаеш прынцыпы нейтральнасці і ты паказваеш сваё меркаванне. Так звычайна не робяць», – пракаментаваў «Белсату» гэтыя «зычэнні поспехаў» гісторык, палітычны аглядальнік Аляксандр Фрыдман.
Паводле яго, Масква такім чынам паказала, на чыім баку яна стаіць, каго яна падтрымлівае і хто ёй патрэбны:
«Гэта робіцца вось так абсалютна адкрыта. Яны кажуць: "Нам патрэбны Лукашэнка, мы гэтага Лукашэнку падтрымліваем, гэта наш кандыдат"».
Фрыдман растлумачыў, чаму беларуская прапаганда сціпла праігнаравала зычэнні галоўнага хаўрусніка Лукашэнкі. Аналітык мяркуе, што гэтым мэсіджам Крэмль даў зразумець, што ўважліва сочыць за падзеямі ў Беларусі і цалкам кантралюе нашую краіну. Зычэнне Пуціна ў Менску зразумелі гэтак жа, таму і змаўчалі:
«У Маскве бачаць Беларусь як краіну, што цалкам пад іхным кантролем. Яны маюць свой погляд на тое, хто мусіць кіраваць, і гэтых поглядаў не хаваюць, а паказваюць, што вельмі моцна ўплываюць на Беларусь. Расея падкрэслівае тым самым залежнасць Беларусі».
Звычайна палітыкі перад выбарамі ў іншых краінах кажуць, што «гатовыя працаваць з любой асобаю, якая будзе абраная». Тут атрымалася інакш. Хаця цяпер Лукашэнка і не мае патрэбы ў такім падтрыманні ад Пуціна, у адрозненні ад падзеяў 2020 года, падкрэсліў суразмоўца «Белсату». Дый агулам прапаганда намагаецца пра выбары лішні раз не згадваць, каб ціха было:
«Не такое становішча, каб Лукашэнку патрабавалася заручыцца расейскім падтрыманнем, гэта не 2020 год. Цяпер Лукашэнка ўсё кантралюе і робіць усё, каб гэтыя выбары асабліва заўважнымі не былі. А вось цяпер гэтая навіна пра тое, што Пуцін пажадаў поспехаў, вісіць на ўсіх расейскіх інфармацыйных рэсурсах».
На беларускіх выбарнікаў зычэнне Пуціна асабліва не паўплывае, упэўнены Фрыдман. Кажа, прыхільнікі Расеі і без таго за Лукашэнку прагаласуюць. А вось колькі галасоў намалююць палітыку, які ідзе на сёмы тэрмін ва ўладзе, Лукашэнка з Пуціным акурат маглі абмеркаваць падчас тэлефоннай размовы, дапускае аналітык:
,,«Мабыць, Пуцін і задаў яму гэтае пытанне: колькі напішаш? Я не выключаю, што ў гэтай размове і вызначылася тая лічба, што ў выніку будзе напісаная Лукашэнку».
Фрыдман прагназуе: ад 87 % да 92 %. 87 %, як сцвярджаюць у Расеі, набраў Пуцін на апошніх выбарах, а 92 % – вынік Ільхама Аліева. На думку аналітыка, Лукашэнка ўважае прэзідэнта Азербайджану сябрам і таксама арыентуецца на яго.
95 % у Лукашэнкі не будзе, бо столькі на выбарах у 2021 годзе нібыта атрымаў Башар Асад, якога зрынула ўзброеная апазіцыя, падсумаваў суразмоўца «Белсату».
21 студзеня ў Беларусі распачынаецца датэрміновае галасаванне на «выбарах» прэзідэнта. Асноўны дзень галасавання – 26 студзеня.
Сцяпан Кубік belsat.eu
