Прэзідэнт Літвы Гітанас Наўседа заявіў, што не бачыць праблемы ў Пагоні на пашпарце Новай Беларусі і што аб прызнанні гэтага дакументу «варта падумаць». Палітык пры гэтым назваў Пагоню літоўскім сімвалам.
«Мы можам дазволіць выкарыстоўваць гэты сімвал народам, што спавядаюць свабоду і не стаяць на каленях перад Пуціным», – сказаў прэзідэнт Літвы Гітанас Наўседа журналістам пасля цырымоніі ўшанавання памяці ўдзельнікаў паўстання 1863–1864 гадоў.
Палітык адзначыў, што літоўскі герб «Віціс» – «выдатны, прыгожы літоўскі сімвал», што «адлюстроўвае нашую волю, творчасць і мужнасць».
Палітычная воля і моц Літвы, як сказаў Наўседа, зыходзіла з Вільні і ахоплівала тэрыторыі цяперашніх Беларусі і Украіны. «Для мяне сумневаў у гэтым няма. Гісторыя такая, і ніхто яе не плануе перапісваць», – заявіў літоўскі прэзідэнт.
Ён падкрэсліў, што ў сітуацыі з пашпартам Новай Беларусі больш важна абмяркоўваць не ўласна сімвал на вокладцы, а «юрыдычныя і дыпламатычныя аспекты»: «Гэта варта разглядаць».
Раней некаторыя літоўскія дэпутаты паскардзіліся ў сваё МЗС і запатрабавалі «прыняць захады» з увагі выкарыстання «літоўскай дзяржаўнай сімволікі» ў пашпарце Новай Беларусі. У ведамстве на гэта адказалі, што не бачаць праблемы ў тым, што на вокладцы дакументу – герб, падобны да літоўскага.
Пашпарт Новай Беларусі абраная прэзідэнтка Святлана Ціханоўская плануе прэзентаваць 26 студзеня ў Варшаве на фэсце «Беларусы годныя лепшага». У той жа дзень пачнуць прымаць заяўкі ад ахвочых. За дакумент давядзецца заплаціць 97 еўраў.
Пашпарт яшчэ не прызнае аніводная краіна, аднак у Офісе Ціханоўскай запэўніваюць, што працуюць з гэтым. У ідэале дакумент мае стацца альтэрнатываю сіняму пашпарту для беларусаў у выгнанні, якія не могуць з'ездзіць на радзіму, каб замяніць яго пасля сканчэння тэрміну дзеяння.
Сцяпан Кубік belsat.eu
