Прэс-сакратар Белага дому Энтані Блінкен выступіў з заяваю, што ў цяперашніх рэпрэсіўных умовах у Беларусі прэзідэнцкія выбары 2025 года не могуць быць ні свабоднымі, ні справядлівымі.
Рэжым Лукашэнкі загадзя вызначыў вынікі выбараў, сістэматычна задушваючы любое іншадумства і пазбаўляючы беларусаў магчымасці выбіраць сваіх лідараў і будучыню сваёй краіны, гаворыцца ў прэс-рэлізе Белага дому.
У ім адзначаецца, што Злучаныя Штаты разам з еўрапейскімі саюзнікамі лічаць, што выбары ў краіне, дзе пануе цэнзура, няма незалежных медыяў, апазіцыйныя кандыдаты альбо ў турмах, альбо вымушаныя жыць у выгнанні, а на выбарчых бюлетэнях застаюцца толькі зацверджаныя рэжымам кандыдаты, не могуць быць легітымнымі.
,,«Няздольнасць рэжыму своечасова накіраваць АБСЕ запрашэнне для назірання за будучымі выбарамі падкрэслівае яго ігнараванне празрыстага выбарчага працэсу, а таксама сваіх абавязанняў як дзяржавы – ўдзельніцы АБСЕ. Злучаныя Штаты асуджаюць кампанію рэпрэсіяў рэжыму Лукашэнкі і яго спробы легітымізаваць выбары, што не могуць быць свабоднымі і справядлівымі», – гаворыцца ў заяве.
Энтані Блінкен адзначыў, што рэпрэсіі – гэта праява слабасці, а не сілы. Беспрэцэдэнтныя захады ў задушэнні апазіцыі сведчаць пра тое, што рэжым Лукашэнкі баіцца ўласнага народу.
Мужнасць беларусаў, як унутры краіны, так і за яе межамі, ужо мае свой плён. Злучаныя Штаты прызнаюць выключную трываласць грамадзянаў Беларусі і арганізацыяў грамадзянскай супольнасці, якія змагаюцца за прыцягненне рэжыму да адказнасці. Вашынгтон прадаўжае адстойваць правы амаль 1300 палітычных зняволеных, якія застаюцца за кратамі ў Беларусі.
«Злучаныя Штаты стаяць на баку беларускага народу, які патрабуе празрыстасці, дэмакратыі і свабоды», – адзначае Энтані Блінкен.
Нагадаем, што 26 студзеня ў Беларусі маюць адбыцца так званыя выбары, на якіх няма аніводнага альтэрнатыўнага Аляксандру Лукашэнку кандыдата.
17 студзеня МЗС Беларусі напісала, што накіруе запрашэнне ў БДІПЧ для назірання за галасаваннем. Менск адзначыў, што ЦВК ужо акрэдытавала 456 міжнародных назіральнікаў з 49 краінаў свету. Запрашэнні атрымалі Выканкам і Міжпарламенцкая асамблея СНД, Парламенцкая асамблея АДКБ, Парламенцкі сход Саюзнай дзяржавы, Шанхайская арганізацыя супрацы.
Паводле эксперта ў справе выбараў і спецыяльнага дарадцы Святланы Ціханоўскай Аляксандра Шлыка, улады Беларусі запрасілі назіраць за галасаваннем на прэзідэнцкіх выбарах БДІПЧ АБСЕ, каб паставіць арганізацыю ў няёмкае становішча і з прапагандысцкімі мэтамі, а не дзеля празрыстасці – запрашэнне зрабілі позна і цяпер арганізацыя мусіла б адмовіцца.
У выніку сапраўды АБСЕ адмовілася накіроўваць сваіх назіральнікаў на прэзідэнцкія выбары ў Беларусь, пра што зробленая адпаведная заява. У ёй гаворыцца, што позняе запрашэнне ад Беларусі, усяго за 10 дзён да прэзідэнцкіх выбараў, «не дазваляе БДІПЧ атрымаць доступ да ключавых этапаў выбарчага працэсу, што робіць немагчымым істотнае назіранне».
Раман Шавель belsat.eu
