Савет Міністраў Беларусі вызначыў раёны ў нашай краіне з неспрыяльнымі ўмовамі для вядзення сельскай гаспадаркі на 2025 – 2029 гады: адпаведная пастанова № 19 ад 14 студзеня апублікаваная 18 студзеня на Нацыянальным прававым інтэрнэт-партале.
У пералік неспрыяльных трапілі 65 з 118 раёнаў Беларусі.
Гомельская вобласць амаль уся непрыдатная для сельскай гаспадаркі: у спіс улучаныя ўсе раёны, акрамя Жлобінскага.
Да неспрыяльнай аднесеная значная частка Віцебскай вобласці – усе раёны, акрамя Аршанскага, Дубровенскага, Полацкага, Талочынскага, Шаркаўшчынскага.
У Магілёўскай вобласці неспрыяльнымі для сельскай гаспадаркі прызнаныя Бялыніцкі, Бабруйскі, Быхаўскі, Глускі, Клімавіцкі, Клічаўскі, Касцюковіцкі, Краснапольскі, Магілёўскі, Слаўгарадскі, Хоцімскі, Чавускі, Чэрыкаўскі раёны.
З Берасцейскай вобласці ў спіс неспрыяльных трапілі Ганцавіцкі, Лунінецкі, Пінскі, Маларыцкі і Столінскі раёны, на Меншчыне – Бярэзінскі, Вілейскі, Валожынскі, Крупскі, Лагойскі і Мядзельскі раёны.
Самыя добрыя ўмовы для вядзення сельскай гаспадаркі – у Гарадзенскай вобласці, як вынікае з пастановы Савету Міністраў. Там толькі чатыры раёны прызнаныя неспрыяльнымі: Дзятлаўскі, Іўеўскі, Наваградскі і Свіслацкі.
Спіс неспрыяльных для сельскай гаспадаркі рэгіёнаў складаецца раз на пяць гадоў супольна з Міністэрствам сельскай гаспадаркі, Акадэміяй навук Беларусі на падставе звестак Нацыянальнага статыстычнага камітэту, Міністэрства працы і Дзяржаўнага камітэту ў маёмасці.
Неспрыяльныя для сельскай гаспадаркі раёны – гэта такія, дзе праз прыродна-кліматычныя, глебавыя, экалагічныя і сацыяльна-эканамічныя паказнікі немагчымая арганізацыя высокарэнтабельнай вытворчасці. Сельскагаспадарчыя арганізацыі ў такіх раёнах атрымліваюць даплаты з мясцовых бюджэтаў на вырабленую прадукцыю.
Сельская гаспадарка Беларусі загразла ў даўгах, як вынікае з дакументаў і тэлефонных размоваў, якімі надоечы з намі дзяліліся «BELPOL» і «Кіберпартызаны».
Так, запазычанасць сельскагаспадарчых арганізацыяў Гомельшчыны, прызнанай самай неспрыяльнай, цягам дзевяці месяцаў вырасла на 570 тысячаў рублёў і склала агулам больш за 4,5 млн рублёў. Сярод даўжнікоў – кожная шостая гаспадарка.
Марыя Міхалевіч belsat.eu
