Дэмакратычная лідарка Беларусі Святлана Ціханоўская абмеркавала сітуацыю палітычных вязняў у Беларусі з намеснікам дзяржаўнага сакратара ЗША Кертам Кэмпбэлам праз тэлефон.
«Дыялог датычыўся апошніх навінаў пра беларускіх палітвязняў і магчымых крокаў, якія могуць спрыяць іх вызваленню», – цытуе словы Святланы Ціханоўскай яе тэлеграм-канал.
Акрамя гэтага, бакі абмеркавалі працяг стратэгічнага дыялогу паміж беларускімі дэмакратычнымі сіламі і Вашынгтонам, супрацу з новай адміністрацыяй ЗША, пашырэнне міжнароднага ўзаемадзеяння, праграмы абменаў і стыпендыяў для беларусаў.
У верасні мінулага года Ціханоўская сустракалася з Кертам Кэмпбэлам у Вашынгтоне, дзе яны абмеркавалі шляхі вызвалення палітвязняў у Беларусі.
Перад гэтым палітычная дзяячка сустракалася з ім у Вільні. Намеснік дзяржаўнага сакратара ЗША запэўніў яе, што Вашынгтон працягне падтрымліваць беларускі народ і дэмакратычную супольнасць.
А ўжо 4 снежня мінулага года Кэмпбэл заявіў у відэазвароце да ўдзельнікаў другога стратэгічнага дыялогу беларускага дэмакратычнага руху з урадам ЗША ў Вільні пра далейшае падтрыманне дэмакратычных памкненняў беларусаў.
Надзея Вольная belsat.eu
