Пра смерць 78-гадовага галівудскага рэжысёра паведамілі ягоныя сваякі.
«З глыбокім шкадаваннем мы, ягоная сям'я, паведамляем аб смерці чалавека і мастака Дэйвіда Лінча. Мы будзем удзячныя за пэўную прыватнасць у гэты час. Цяпер у свеце вялікая дзірка, калі яго больш няма з намі. Але, як ён казаў, «Глядзі на пончык, а не на дзірку». Гэта цудоўны дзень з залатым сонцам і блакітным небам на ўсім шляху», – напісалі ягоныя сваякі ў Фэйсбуку.
Дэйвід Лінч – адзін з найважнейшых класікаў аўтарскага кіно, лаўрэат «Оскара», «Залатой пальмавай галіны» і «Залатога льва». Масаваму гледачу Лінч вядомы як рэжысёр культавага серыялу «Твін Пікс», які выйшаў на пачатку 1990-х. У 2017 годзе Лінч зняў працяг серыялу «Твін Пікс: Вяртанне» – сваю апошнюю працу.
Сярод іншых вядомых работ Дэйвіда Лінча – «Малголэнд Драіў», «Чалавек-слон», «Сіні аксаміт», «Шаша ў нікуды».
У жніўні 2024 года рэжысёр распавядаў, што ў яго дыягнаставалі эмфізэму лёгкіх, і ён перастаў выходзіць з дому.
«У мяне эмфізэма ад доўгага палення, і таму я прыкуты да дому, падабаецца мне гэта ці не. Я не магу выйсці на вуліцу. І я магу прайсці толькі невялікую адлегласць, потым мне бракуе кіслароду», – сказаў «The Guardian» рэжысёр, адказваючы на пытанне, ці хоча ён зноў здымаць фільмы.
Замест гэтага ён здымаў не менш сюррэалістычныя прагнозы надвор'я, адсылку да якіх і зрабілі сваякі ў паведамленні пра смерць рэжысёра.
Тэса Анэйда belsat.eu
