Міністр унутраных справаў Іван Кубракоў правёў інструктаж міліцыі Менску. У панядзелак яна пераводзіцца на ўзмоцнены варыянт нясення службы.
«З 20 студзеня органы ўнутраных справаў і ўнутраныя войскі пераводзяцца на ўзмоцнены варыянт нясення службы. Усе выбарчыя ўчасткі абследаваныя, абсталяваныя сістэмамі відэаназірання і кнопкамі трывожнай сігналізацыі, будуць узятыя пад кругладзённую ахову», – паведамляе прэс-служба МУС.
А каб напэўна «не дапусціць дэстабілізацыі грамадска-палітычнай сітуацыі ў перыяд выбараў», на дапамогу міліцыі адправяць добраахвотныя дружыны, ветэранаў органаў унутраных справаў і курсантаў ведамасных установаў адукацыі.
І гэта з улікам таго, што апошні раз на ўзмоцнены варыянт нясення службы іх пераводзілі літаральна напярэдадні: з 31 снежня 2024-га да 8 студзеня 2025 года. Тады праз усе месцы правядзення масавых мерапрыемстваў прайшлі сапёры, а пасля там паставілі дзяжурыць супрацоўнікаў міліцыі.
Акрамя таго, апошнімі днямі міліцыянты актыўна наведваюць арэндныя кватэры ў розных гарадах краіны: просяць паказаць дамову арэнды і цікавяцца, «што вы будзеце рабіць 26 студзеня».
Тэса Анэйда belsat.eu
