За Аляксандра Лукашэнку на «выбарах» гатовыя прагаласаваць 82,5 % беларусаў. Пра гэта заявіла загадчыца кафедры эканамічнай сацыялогіі і псіхалогіі прадпрымальніцкай дзейнасці, кіраўніца Цэнтру сацыяльна-гуманітарных даследаванняў БДЭУ Ірына Лашук.
Паводле праўладнага апытання, 82,5 % гатовыя прагаласаваць за «дзейнага кіраўніка дзяржавы», «за альтэрнатыўнага кандыдата» – 2,9 %, «супраць усіх» – 7,9 %. Не будуць галасаваць 6,7 %, перадае БелТА.
«Адпаведна, беларускае грамадства ўпэўненае ў рэалізуемым дзяржаўным курсе, у выбудоўванні міжнародных стасункаў, што стварае спрыяльную аснову для развіцця стратэгічнага ўзаемадзеяння з іншымі краінамі», – заявіла Ірына Лашук.
Апытанне праводзілася метадам пакватэрнага інтэрв'ю (выбарка – 1500 рэспандэнтаў). Ці бралі ўдзел у такім апытанні сілавікі, не ўдакладняецца.
26 студзеня беларусаў чакаюць перавыбары Аляксандра Лукашэнкі на сёмы тэрмін прэзідэнцтва. Сумневаў у тым, што яму намалююць патрэбную лічбу, няма амаль што ні ў кога. Але інтрыгаю застаецца, якою будзе гэтая лічба.
Палітычны аглядальнік Віталь Цыганкоў падкрэсліў, што дыскусіі пра тое, колькі адсоткаў намаляваць Лукашэнку, у атачэнні беларускага кіраўніка ідуць перад кожнымі выбарамі, і 2020 год не быў выключэннем. Гэтым разам, на думку Цыганкова, улады ўсім сваім выглядам паказваюць, што гэтая выніковая лічба для іх сапраўды мае значэнне, і перад прапагандаю стаіць задача паказаць павелічэнне падтрымання.
На думку палітычнага аглядальніка, калідор, у якім Лукашэнку будуць маляваць перамогу, змяшчаецца паміж 80 і 90 %, хоць у імавернасць 90 % наш суразмоўца не вельмі верыць.
Якуб Хруст belsat.eu
