Дзяржаўны сакратар Савету Бяспекі Беларусі Аляксандр Вальфовіч у інтэрв’ю дзяржаўным медыям расказаў пра планы, што нібыта ёсць у дэмакратычных сілаў, наконт стварэння вольнай Беларусі і вызвалення краіны ад уладаў Аляксандра Лукашэнкі.
Аляксандр Вальфовіч заявіў, што ў межах «плану Перамога 2.0» вядзецца актыўнае рыхтаванне Беларускага вызвольнага войска. У Польшчы для кіраўніцтва працэсамі навучання камандна-каардынацыйным цэнтрам нібы ёсць «Паспалітае рушэнне», што рыхтуе «баявое крыло». Таксама ва Украіне «з удзелам спецыялістаў украінскіх і заходніх спецслужбаў і спецпадраздзяленняў ажыццяўляецца вайскова-дыверсійная падрыхтоўка» беларускіх вайскоўцаў.
,,«Паводле звестак, разглядаецца магчымасць далучэння названых экстрэмісцкіх фармаванняў да ўзброенай аперацыі захопу аднаго або некалькіх памежных раёнаў Беларусі, абвяшчэння гэтай тэрыторыі вольнай і ўводу туды заходнімі краінамі нейкага міратворчага кантынгенту», – сказаў Вальфовіч.
Паводле яго, таксама ўкраінскія спецслужбы актыўна вярбуюць праз інтэрнэт беларускіх грамадзянаў «з мэтаю іх схілення да аказання садзейнічання». Спачатку іх нібы просяць дапамагчы са зборам інфармацыі, а затым плануюць прыцягнуць да стварэння сховішчаў са зброяй і боепрыпасамі, выбуховымі прыладамі і выбуховымі рэчывамі для супраціву сілавікам на тэрыторыі Беларусі і Расеі.
Пра тэракты і захоп аб’ектаў улады кажуць не ўпершыню. У кастрычніку 2022 года кіраўнік КДБ Іван Церцель заяўляў, што пад кіраўніцтвам ЦРУ ў Польшчы, Літве і Украіне рыхтуюць баевікоў і плануюць тэракты. Галоўным тады быў паўднёвы кірунак: паводле старшыні КДБ, замежныя спецслужбы нібыта падрыхтавалі ва Украіне «ад 100 да 300 баевікоў», якія мусяць захапіць нейкі райцэнтр у Беларусі і выкарыстаць яго як «плацдарм для далейшай наступальнай аперацыі». Прычым кіраўнік КДБ тады нават называў канкрэтныя тэрміны і мясцовасць: ён анансаваў, што такі ўдар можа быць нанесены ў кірунку Маларыты ў лістападзе 2022 года.
Агучаны спецслужбамі сцэнар захопу райцэнтру знайшоў сваё адлюстраванне ў адмысловых вучэннях, што пачало ладзіць МУС недалёка ад мяжы з Украінаю. Паводле легенды, на горад нападалі дыверсанты, расстрэльвалі пост ДАІ, забіралі зброю, а затым сілавікі праводзілі «контртэрарыстычную аперацыю для лакалізацыі праціўніка». На хвалі прапагандысцкай істэрыі тагачасны міністр замежных справаў Уладзімір Макей паведаміў, што ў Беларусі ўжо ўведзены рэжым контртэрарыстычнай аперацыі (КТА). Праўда, як неўзабаве высветлілася, гэта не адпавядала рэчаіснасці.
Якуб Хруст belsat.eu
