Сайт будаўнічай фірмы Валера Сахашчыка sahaty.pl узламалі. Пра гэта паведамілі чытачы «Белсату», якія падзяліліся скрыншотам старонкі сайту, на якой з’явілася паведамленне аб узломе і патрабаванне цягам 72 гадзін звязацца са зламыснікамі – інакш будзе апублікаваная далікатная для кампаніі інфармацыя. У якасці доказаў узлому даецца спасылка на частку інфармацыі пра кампанію і асабістыя звесткі супрацоўнікаў.
У размове з «Белсатам» Валер Сахашчык пацвердзіў, што сайт ягонай фірмы ўзламалі, файлы зашыфраваныя і зламыснікі патрабуюць грошай. Але колькі дакладна – пакуль не вядома. Сахашчык спадзяецца вырашыць праблему без звароту да ўзломшчыкаў.
Хто мог такое зрабіць, ён не ведае.
«Я першы раз у такой сітуацыі. І няма здагадак. Варыянты, вядома, ёсць у галаве, але дакладна я не ведаю, – кажа Сахашчык. – Праблемы зрабілі мне ў працы фірмы. Даволі часта так робіцца, калі нейкія хакеры ўзломваюць сайты кампаній, шыфруюць дадзеныя і патрабуюць грошай за гэта. На жаль, так бывае, нехта зарабляе такім чынам».
Цяпер сайт у «аварыйным стане» – больш няма паведамлення зламыснікаў, але і ніякага меню.
«Высвятляем, наколькі глыбокія праблемы, можа, і дамо рады сваімі сіламі, можа, будзем размаўляць з людзьмі, якія гэта зрабілі. Пабачым. Яшчэ трошкі рана аб гэтым гаварыць.
Для мяне цяпер час няўдалы для такіх эксперыментаў, бо закрываем год, які адпрацавалі. І вельмі шмат працы цяпер з дакументамі, але нічога страшнага няма. Калі баяцца нейкага зліву інфармацыі, то мне няма чаго баяцца – я працую ў прававым полі цалкам. Гэта легальны бізнес. Што там можа быць такога? Нейкая канфідэнцыйная інфармацыя, камерцыйныя тайны мае як фірмы – страшнага нічога няма. Непрыемна, але страшнага нічога няма», – рэзюмуе Валер Сахашчык.
«Наша Ніва» прыйшла да высновы, што ўзламаны не толькі сайт, але і ўся офісная сетка кампаніі. Выданне схіляецца да таго, што гэта праца беларускіх спецслужбаў.
У каментары «Зеркалу» ён абверг версію тэлеграм-каналу, звязанага з беларускімі сілавікамі, аб тым, што да ўзлому датычны прадстаўнік АПК у нацыянальнай бяспецы Вадзім Кабанчук.
Арсен Рудэнка belsat.eu
