Расея планавала тэракты ў паветры супраць Польшчы і іншых краінаў па ўсім свеце. Такую заяву 15 студзеня зрабіў прэм'ер-міністр Польшчы Дональд Туск пасля сустрэчы з прэзідэнтам Украіны Уладзімірам Зяленскім у Варшаве.
Дональд Туск спаслаўся на новыя выведкавыя звесткі, але не агучваў падрабязнасцяў.
«Апошняя інфармацыя пацвярджае абгрунтаванасць боязі, што Расея планавала тэрарыстычныя акты ў паветры не толькі супраць Польшчы», – заявіў польскі прэм'ер.
Расея пакуль не адрэагавала на гэтае абвінавачанне.
Раней у бок Расеі ўжо гучалі абвінавачанні ў рыхтаванні і правядзенні дыверсіяў супраць аб'ектаў крытычнай інфраструктуры. Найбольш вядомыя – пашкоджанне кабеляў у Балтыйскім моры.
Нагадаем, нядаўна прэм’ер-міністр Польшчы Дональд Туск таксама заявіў, што Злучаныя Штаты найбліжэйшым часам могуць зрабіць заявы наконт спынення агню і гарантыяў бяспекі для Кіева.
Паводле Туска, план новаабранага прэзідэнта ЗША Доналда Трампа ў дачыненні Украіны пакуль яшчэ на стадыі распрацоўвання.
Пры гэтым Туск падкрэсліў, што Еўропа і Польшча будуць вымушаныя браць на сябе большую адказнасць за сваю бяспеку, незалежна ад таго, які курс возьме новая адміністрацыя ЗША.
Надзея Вольная belsat.eu
