Ад 1 лютага збор за пераход мяжы ў Гарадзенскай вобласці складзе адну базавую велічыню – 42 рублі. Гэтак жа – у Берасцейскай і Віцебскай вобласцях.
Гарадзенскі абласны Савет дэпутатаў пастанавіў вярнуць мясцовы збор за перасячэнне мяжы на транспартных сродках. Рашэнне афіцыйна апублікавалі на Pravo.by, яно набудзе моц 1 лютага.
Збор складзе адну базавую велічыню, сёлета гэта 42 рублі. Аналагічны збор вярнулі раней Берасцейская і Віцебская вобласці.
У Гарадзенскай вобласці месцяцца адкрытыя пункты пропуску «Беняконі» і «Каменны Лог» (на мяжы з Літвой, па дарозе на Вільню) і шэраг закрытых.
Ад збору ў Гарадзенскай вобласці вызваленыя некаторыя катэгорыі людзей, якія маюць дакументальнае пацверджанне мэтаў паездкі: прадстаўнікі дзяржаўных органаў пры выкананні службовых абавязкаў; грамадзяне, якія едуць па медычную дапамогу, і іхнае суправаджэнне; суправаджэнне малалетніх дзяцей, якія едуць на санаторна-курортнае лячэнне; замежныя грамадзяне, запрошаныя ў Беларусь на афіцыйныя падзеі; замежнікі і асобы без грамадзянства з абмежаваннямі фізічнай актыўнасці на 75–100 % інваліднасці; асобы, якія едуць на пахаванне блізкіх сваякоў; асобы, якія выязджаюць праз пастанову аб дэпартацыі.
Збор за перасячэнне мяжы Беларусі для транспартных сродкаў з масай не большай за 5 тонаў і ў незалежнасці ад колькасці пасажыраў быў уведзены 1 жніўня 2021 года як дадатковая захада для барацьбы з каронавіруснай інфекцыяй. З таго часу дзеянне збору ўвесь час падаўжалі. Яго можна аплаціць праз сістэму АРІП ці ў пункце памежнага пропуску.
Зборы ўводзілі раней не на пастаяннай аснове, іх мусілі працягваць штогод. Выйшла, што ад 1 студзеня да 1 лютага 2025 года зборы не дзеялі.
Як распавядаў кіраўнік галоўнага фінансавага ўпраўлення Віцебскага аблвыканкаму Яўген Каросцік, за 2024 год у бюджэт вобласці шляхам спагнання збору за перасячэнне мяжы паступіла каля 2 млн рублёў.
Алесь Наваборскі belsat.eu
