навіны

Дор'ян С. перапрасіў за забойства беларускі Лізы

img
Дор'ян С. перад трэцім паседжаннем суда ў справе аб згвалтаванні і забойстве беларускі Лізы. 13 студзеня 2025 года. Фота: Белсат
podpis źródła zdjęcia

Фігурант справы аб згвалтаванні і забойстве беларускі Лізы перапрасіў за тое, што зрабіў, падчас апошняга слова ў судзе, перадае карэспандэнт «Белсату» са спасылкаю на адваката пацярпелых.

13 студзеня ў Акруговым судзе Варшавы адбылося трэцяе паседжанне ў справе 23-гадовага Дорʼяна С., абвінавачанага ў згвалтаванні і забойстве беларускі Лізы ў цэнтры польскай сталіцы. Журналістаў пусцілі ў залу толькі ў канцы паседжання, бо на ім агучваліся падрабязнасці прыватнага жыцця трэціх асобаў.

Пракурор адказвае на пытанні журналістаў пасля трэцяга пасяджэння па справе Дор’яна С., абвінавачанага ў згвалтаванні і забойстве беларускі Лізы ў Варшаве ў ноч на 25 лютага 2024 года. Варшава, Польшча. 13 студзеня 2025 года. Фота: Белсат
Пракурор запатрабаваў для абвінавачанага ў забойстве беларускі Лізы пажыццёвага зняволення навіны

Падчас сённяшніх спрэчак бакоў абвінавачанне запатрабавала для фігуранта пажыццёвага зняволення і абавязання выплаціць кожнаму з двух пацярпелых – брату і хлопцу Лізы – 200 тысячаў злотых (у пераліку каля 48 тысячаў долараў).


Адвакаты ж абвінавачанага паставілі пад сумнеў высновы экспертаў, якія пастанавілі, што той застаецца ў стане свядомасці. Суд гэтыя сумневы адхіліў, адзначыўшы, што для вынясення выраку доказаў дастаткова.


Прадстаўнік пацярпелых Караль Дрождж, які даў каментар журналістам пасля паседжання, растлумачыў неабходнасць пажыццёвага зняволення для фігуранта гэтай гучнай справы:

,,

«Улічваючы характар справы, яе хаду і паводзіны злачынцы, нам здаецца, што гэта адзіная магчымасць абараніць грамадства агулам. Калі пакідаць такіх злачынцаў на волі, то рызыка таго, што яны здзейсняць такі ўчынак у будучыні, узрастае».


Адвакат таксама адзначыў, што абвінавачаны ўпершыню перапрасіў за тое, што зрабіў:
,,

«У сваім апошнім слове ён упершыню ўголас выказаў пакаянне ў тым, што зрабіў. Прынамсі вусна».


Паводле праўніка, апошняе слова абвінавачанага было кароткім:


«Два сказы. Перапрасіў».


Прадстаўніца грамадскага боку, што браў удзел у судзе, адвакатка Фонду супраць гвалту Каміля Фэрэнц сказала журналістам, што перапрашэнне з вуснаў абвінавачанага ў злачынстве магло быць няшчырым:

,,

«Так, перапрашэнне было, імаверна, таму, што гэта тактыка абароны. Больш нічога не магу сказаць, бо гэта датычыць закрытай часткі суда. Аднак словы пакаяння не вернуць жыцця Лізе, як і бяспекі іншым жанчынам».


Адвакатка выказала спадзеў на тое, што гэты працэс «станецца не толькі данінаю памяці Лізаветы». Праўніца адзначыла, што грамадства мусіць «рашуча асудзіць мысленне, згодна з якім жанчына – кавалак плоці, з якога можна здзекавацца»:


«Мы мусім развязваць праблему сістэмна, бо такіх асобаў можа быць болей. Гэта не псіхічна хворыя людзі або ўдзельнікі злачынных груповак. Гэта можа быць добры сусед, чалец сямʼі. Мы мусім паклапаціцца пра тое, каб думка, што жанчына можа стаць ахвяраю, ніколі не была нормаю і стандартам, каб яна знікла з пошлых жартаў і сяброўскіх размоваў, каб яна знікла з інтэрнэту».

Заснавальніца праваабарончага праекту «Мартынка» Насця Падарожная з партрэтам Лізы адказвае на пытанні журналістаў пасля трэцяга паседжання ў справе Дор’яна С., абвінавачанага ў згвалтаванні і забойстве беларускі Лізы. Варшава, Польшча. 13 студзеня 2025 года. Фота: Белсат
Заснавальніца праваабарончага праекту «Мартынка» Насця Падарожная з партрэтам Лізы адказвае на пытанні журналістаў пасля трэцяга паседжання ў справе Дор’яна С., абвінавачанага ў згвалтаванні і забойстве беларускі Лізы. Варшава, Польшча. 13 студзеня 2025 года. Фота: Белсат

Кіраўніца арганізацыі дапамогі ахвярам гвалту «Мартынка» Насця Падарожная, якая таксама ўдзельнічала ў працэсе ў якасці прадстаўніцы грамадства, у размове з журналістамі назвала важным, каб у выпадку гвалту заўсёды былі вельмі сурʼёзныя наступствы:


«Мы ўсё яшчэ змагаемся за тое, каб Ліза не знікла, але калі мы адкрыем "Netflix", то пабачым серыялы пра забойцаў. Ёсць шмат кніг, напісаных серыйнымі забойцамі, ёсць людзі, якія становяцца знакамітымі з увагі на забойствы. Аднак пра Лізу ўжо наўрад ці хто згадае. І гэта наш апошні шанец як грамадства хаця б годна адказаць на тое, што з ёй адбылося».


Суд агучыць вырак Дорʼяну С. на апошнім паседжанні 17 студзеня.


Дар’я Форман, Сцяпан Кубік belsat.eu

больш па гэтай тэме

Глядзіце больш
Item 1 of 4

апошнія

Item 1 of 10