Упраўленне ўнутраных справаў Гомельскай вобласці абвесціла ў вышук расейскага журналіста-расследавальніка і вядоўцу праграмы «Можем объяснить» Іллю Даўлятчына. Яго абвінавачваюць у спрыянні экстрэмісцкай дзейнасці (ч. 2 арт. 361 КК РБ). Расеец таксама трапіў у расейскую базу вышуку.
Нагодай для крымінальнай справы супраць Даўлятчына паслужыў ягоны ўдзел у ток-шоу «План: Б» на нашым тэлеканале, які ў Беларусі прызнаны «экстрэмісцкім фармаваннем», а ў Расеі – «непажаданай арганізацыяй».
У вышук расейскага журналіста абвесцілі яшчэ 25 лістапада 2024 года. Яму пагражае ад 3 да 7 гадоў зняволення.
Адвакаты Даўлятчына апавясцілі Інтэрпол пра палітычны характар пераследу.
У лістападзе 2023 года Міністэрства юстыцыі Расеі прызнала Даўлятчына «замежным агентам», у снежні 2023 года ў рэестр «замежных агентаў» быў унесены і праект «Можем объяснить».
У чэрвені 2024 года ў Беларусі была пачатая крымінальная справа за «спрыянне экстрэмізму» ў дачыненні вядоўцаў і гасцей выданняў праграмы «План: Б», якія выйшлі ў сакавіку 2024 года. Агулам фігурантамі справы сталіся больш за 20 чалавек.
За ўдзел у «Плане: Б» завочна судзілі блогерку Вольгу Павук – разам з іншымі эпізодамі суд прызначыў ёй 8 гадоў зняволення.
Марыя Міхалевіч belsat.eu
