У Акруговым судзе Варшавы пачалося трэцяе пасяджэнне ў справе Дор'яна С., якога вінавацяць у згвалтаванні і забойстве беларускі. Чакаецца, што сёння адбудуцца спрэчкі бакоў, перадае карэспандэнт «Белсату».
Разгляд справы аб згвалтаванні і забойстве беларускі Лізы ў цэнтры Варшавы набліжаецца да фіналу. На трэцім пасяджэнні, што пачалося 13 студзеня ў Акруговым судзе польскай сталіцы, плануюцца канчатковыя прамовы бакоў, пасля суддзі пачнуць абмяркоўваць вырак.
Сённяшняе пасяджэнне, як і папярэдняе, могуць закрыць ад публікі.
Карэспандэнт «Белсату» перадае, што прысуд могуць агучыць і сёння, аднак больш імаверна, што гэта адбудзецца на апошнім пасяджэнні. Паводле неафіцыйных звестак, яго запланавалі на 17 студзеня. Паводле закону, суд мае 14 дзён, каб вызначыцца з выракам.
Суд над Дор'янам С. пачаўся 4 снежня. 23-гадовага паляка вінавацяць у згвалтаванні, забойстве і разбоі. Маладзёну пагражае ад 12 гадоў да пажыццёвага зняволення.
Другое пасяджэнне суда адбылося 16 снежня, у той дзень сведчылі таксіколаг, сексолаг і псіхіятры, а таксама бацькі абвінавачванага. Усё прайшло за зачыненымі дзвярыма.
Паводле следства, Дор'ян С. напаў на беларуску Лізу ў цэнтры Варшавы ў ноч на 25 лютага. Ён душыў дзяўчыну, згвалціў яе і сышоў, забраўшы ейны тэлефон і банкаўскія карткі. Праз шэсць дзён беларуска памерла ў шпіталі.
Фігурант справы ў сваіх паказаннях, якія ён пацвердзіў у судзе, запэўніваў, што забіваць ахвяру не хацеў. Першапачаткова планаваў абрабаваць краму ці бар, каб здабыць грошы на аплату кватэры.
Чаму пазбавіў дзяўчыну жыцця і згвалтаваў яе, маладзён растлумачыць не здолеў.
Дар’я Форман, Сцяпан Кубік belsat.eu
