Чарга ў Берасці, дзе працуе адзіны пункт пропуску на мяжы з Польшчаю, не скарачаецца, там цяпер 2000 легкавікоў. Апоўдні афармляцца пачынаюць тыя, хто зарэгістраваўся ў чарзе аб 11:00 9 студзеня. Такім чынам, час чакання перавысіў чацвёра содняў.
Паводле звестак Дзяржаўнага памежнага камітэту на 12:00, выезду ў Польшчу чакаюць 1998 легкавікоў. Велізарная чарга пачала ўтварацца ў Берасці 3 студзеня, тады ў ёй было больш за тысячу машынаў. А 5 студзеня колькасць аўтаў вырасла ўдвая, і з таго дня чарга не змяншаецца.
Цяпер у пункт пропуску выклікаюць тых, хто зарэгістраваўся ў сістэме аб 11:00 9 студзеня. Гэтым падарожнікам давялося чакаць больш за чацвра содняў.
У тэматычных Telegram-чатах сведчаць, што на ўласна афармленне на беларускім і польскім баках трэба яшчэ каля 6 гадзінаў.
У Тэрэспалі ў бок Беларусі чаргі няма зусім. Падарожнікі пішуць, што праходзяць мяжу ў сярэднім за гадзіну.
Аўтобусаў у чарзе ў Берасці цяпер 15. Калі не перасаджвацца, то чакаць давядзецца каля 18 гадзінаў. Пасажыры паведамляюць, што кіроўцы бяруць на падсадку, тады ўсё пройдзе істотна хутчэй: 7–8 гадзінаў. За гэты камфорт давядзецца даплаціць 50–70 еўраў.
«Наш аўтобус быў поўны, аднак потым багата людзей перасела, да шлагбаума ехалі напаўпустыя».
У Беларусь аўтобусам хутка, каля 3 гадзінаў. Што праўда, беларускія службоўцы даглядаюць вельмі пільна.
«Поўны шмон, металадэтэктар, рамка, усё з кішэняў, торбы рукамі і праз рэнтген».
На астатніх пунктах пропуску (у «Каменным Лозе» і «Беняконях» на мяжы з Літвою і ў «Грыгароўшчыне» на мяжы з Латвіяй) чэргаў няма ў абодва бакі.
Сцяпан Кубік belsat.eu
