34-гадовы мужчына з падвойным грамадзянствам – беларускім і нямецкім – быў затрыманы ў Нямеччыне. Ён знаходзіўся пад уздзеяннем наркотыкаў, яго падазраюць у серыі крадзяжоў, піша presseportal.
Супрацоўнікі нямецкай паліцыі 9 студзеня 2025 года ў рамках дарожнага кантролю каля гораду Мюльхайм хацелі спыніць аўтамабіль «Opel Corsa».
Аднак кіроўца не адрэагаваў на сігнал паліцэйскіх, павялічыў хуткасць аўтамабілю і паехаў далей праз цэнтр гораду. Паліцыя распачала пераслед. Але пагоня хутка скончылася, калі «Opel» заехаў у тупік. Тады кіроўца выйшаў з аўтамабілю і кінуўся на ўцёкі. Ён паспрабаваў схавацца ў бліжэйшым гатэлі, дзе яго і затрымалі.
Кіроўцам, які ўцякаў ад паліцыі, аказаўся 34-гадовы жыхар Мюльхайму з беларускім і нямецкім грамадзянствам. Мужчына знаходзіўся ў стане наркатычнага ап’янення. Пры сабе ў яго была невялікая колькасць какаіну і гераіну, у кішэні курткі – вялікая сума грошай гатоўкай.
Паліцыя праверыла аўтамабіль і высветліла, што ён знаходзіцца ў вышуку, а нумарныя знакі былі скрадзеныя. У аўтамабілі таксама знайшлі наркотыкі і абсталяванне для ўзлому. Гэта падтштурхнула супрацоўнікаў паліцыі да падазрэнняў, што затрыманы мужчына можа быць замяшаны ў крадзяжах са ўзломам, таму ў ягонай кватэры правялі ператрус.
Знайшлі газавы пісталет, а таксама некалькі мабільных тэлефонаў, планшэты, ключы, старажытную агнястрэльную зброю, касметыку – імаверна, гэта ўсё было скрадзена. Крымінальная паліцыя канфіскавала гэтыя рэчы, а таксама аўтамабіль, і распачала расследаванне. Беларуса затрымалі.
Марыя Міхалевіч belsat.eu
