Гранты ад 50 тысяч еўра дадуць калектыўным навуковым праектам ва ўсіх галінах даследаванняў. Заяўкі прымаюць пры ўмове, што ў даследніцкай групе ёсць хоць адзін чалавек з Беларусі, які пацярпеў за сваю грамадзянскую пазіцыю пасля выбараў-2020.
Еўразвяз абвясціў конкурс акадэмічных праектаў у межах праграмы «EU4Belarus – SALT III» (трэці этап праграмы «Падтрымка прасунутага навучання і трэнавання»).
Праекты з удзелам прынамсі аднаго беларускага навукоўца (дзейнага ці былога грамадзяніна Беларусі), пацярпелага ад палітычных рэпрэсіяў у Беларусі ад жніўня 2020 года, могуць прэтэндаваць на сумы ад 50 тысяч еўра (да 80 тысяч – для гуманітарных і сацыяльных навук, да 121,25 тысячы – для іншых навуковых сфераў). Агульны бюджэт SALT III – 9,4 млн еўра. Пры іншых роўных прыярытэт будуць надаваць праграмам, у якіх будзе два і больш беларусаў, пацярпелых ад рэпрэсіяў.
Заяўкі прымаюць да 17 сакавіка 2025 года. Падаваць іх маюць універсітэты, акадэмічныя ўстановы і іншыя некамерцыйныя даследніцкія арганізацыі з Еўразвязу. Дэталі і формы для заявак – тут. Іншыя праграмы ў межах «EU4Belarus» – тут.
Алесь Наваборскі belsat.eu
