Менш як год таму Алег Мядзведзеў купіў грузавік, у якім пачаў жыць і працаваць. Мінулай восенню ягоны дом на колах спрабавалі абрабаваць, а калі не ўдалося, спалілі. Грошай на новы дом ці арэнду жытла мужчына не мае, таму просіць дапамагчы яму.
Беларус Алег Мядзведзеў адкрыў збор сродкаў на польскім сайце «Zrzutka.pl»: хоча сабраць 18 тысячаў злотых (каля 4350 долараў) на новае жытло, бо ягоны дом на колах спалілі. На гэтую гісторыю звярнула ўвагу выданне «Most».
Алег Мядзведзеў называе сябе палітычным уцекачом: быў пакараны за ўдзел у пратэстах 2020 года (ягонае імя сапраўды ёсць у базе праваабарончага цэнтру «Вясна» сярод затрыманых 9 жніўня). Расказвае, што пераехаў у Польшчу, спачатку жыў у Лодзі, Катавіцах, нават у анархісцкім сквоце ў Варшаве (бо сам належыць да анархістаў). Калі жыў у Сопаце, набыў невялікі дом-прычэп, жыў у ім некалькі месяцаў. Але зрабілася цесна: ён займаўся распрацоўваннем настольных гульняў, бракавала месца пад 3D-прынтары і абсталяванне для лазернай рэзкі.
У лютым 2024 года Мядзведзеў купіў грузавік «AVIA A31» з домам-прычэпам. Пачаў жыць на беразе мора – у Гурках Заходніх, што ў межах Гданьску.
Паводле Мядзведзева, ягоны дом некалькі разоў спрабавалі абрабаваць. Ноччу 16 кастрычніка 2024 года двум рабаўнікам не пашанцавала – іх затрымала паліцыя. Але і Мядзведзева затрымлівалі на кароткі час, бо ў яго пры сабе быў нож, урэшце адпусцілі.
У пачатку лістапада невядомыя падпалілі ягоны дом на колах. Мядзведзеў мяркуе, што гэта магла быць помста рабаўнікоў. Машына з прычэпам цалкам згарэла. Тое, што было ў жытле Мядзведзева, таксама згарэла. Машына не была застрахаваная ад пажару, таму беларусу не ўдалося атрымаць кампенсацыю.
Мядзведзеў просіць дапамогі, бо не мае грошай на новае жытло. Цяпер працуе за сімвалічныя 440 злотых на месяц (крыху больш за 100 долараў) – падтрымлівае інтэрнэт-старонку няўрадавай арганізацыі. Але падкрэслівае, што мае легальны доступ да рынку працы, шмат што ўмее і гатовы да супрацы.
Як расказвае Мядзведзеў, ён дасведчаны айцішнік: web-распрацоўнік, frontend-праграміст і IT-энтузіяст, а таксама сертыфікаваны спецыяліст у Kanban-менеджменце, бізнес-адміністратар (MBA) з досведам у Scrum і іншых менеджарскіх практыках. Ягоныя профілі ёсць на LinkedIn і GitHub.
Таксама Мядзведзеў заснаваў у Сопаце прастору «44hackerspace». Ён сярод іншага актывіст ініцыятывы «Ежа супраць бомбаў» (бясплатную ежу для бесхацінцаў раздаюць па нядзелях пад скульптурай Нептуна ў Гданьску), супрацоўнічаў з гуманітарнай ініцыятываю «Caritas» Гданьскай архідыяцэзіі і з UNICEF, нават быў намінаваны на «валанцёра года» ў Сопаце ў 2022 годзе.
Акрамя таго, у юнацтве Мядзведзеў быў чэмпіёнам Беларусі ў шахматах, займаў 9-е месца на чэмпіянаце Еўропы, у Польшчы ладзіў бясплатныя шахматныя турніры. Таксама ён сертыфікаваны кіраўнік пешых і роварных тураў 1-й і 2-й катэгорыі.
Алесь Наваборскі belsat.eu
