У ноч на 10 студзеня ў Беларусі на пэўны час перасталі працаваць YouTube і такія сацыяльныя сеткі, як Twitch, Telegram, TikTok і Discord.
Як піша «Motolko.Help», YouTube перастаў працаваць з 01:30. Праблемы былі ў аператараў А1, МТС, Life і ByFly. У некаторых не падгружаліся прэв’ю і аватары, у іншых сайт не працаваў зусім. Таксама пісалі пра праблемы з доступам да Twitch, TikTok і Discord. Telegram таксама не працаваў без VPN.
Акрамя таго, паведамлялася, што не было доступу да шэрагу іншых сайтаў. Напрыклад, не працаваў плэер на «hdrezkа», узніклі праблемы і з сэрвісамі Google. Пры гэтым праз VPN усё працавала.
«Белтэлекам» заяўляў пра «планавыя работы» з 00:00 да 07:30 на сетцы перадачы даных: «магчыма абмежаванне доступу да паслуг сеткі перадачы даных для абанентаў гораду Менску, Гомля і Гомельскай вобласці». МТС таксама паведаміў пра «тэхнічныя работы». Але, як піша «Motolko.Help», дзясяткі сэрвісаў не працавалі па ўсёй краіне, а не толькі ў Менску і Гомлі.
Каля 03:00 паступова сэрвісы пачалі працаваць.
Адзначым, што YouTube у Беларусі блакавалі ў навагоднюю ноч – падчас звароту абранай прэзідэнткі Святланы Ціханоўскай. А 22 лістапада 2024 года Аляксандр Лукашэнка дапусціў поўнае блакаванне інтэрнэту ў краіне ў выпадку пратэстаў супраць арганізаваных ім выбараў – «адключым наагул». У суседняй Расеі таксама з лета абмяжоўваюць доступ да YouTube.
Якуб Хруст belsat.eu
