Краіна разглядае папраўкі да Закона аб іміграцыі, каб стрымліваць рызыкі, звязаныя з разведкай і гібрыднымі пагрозамі, якія значна павялічыліся пасля ўварвання Расеі ва Украіну.
Паводле планаваных зменаў, перад візітам у Латвію неабходна будзе падаваць дадатковую інфармацыю: пра мэту паездкі, час і месца знаходжання, маршрут, кантактную інфармацыю, займаныя пасады, былі лі людзі раней кандыдатамі на выбарах і ці служылі ў розных ведамствах.
Выключэнні прадугледжаны для асоб з дыпламатычным імунітэтам ці тых, хто здзяйсняе кароткатэрміновыя паездкі для выканання афіцыйных функцый або забеспячэння тэхнічнай падтрымкі.
Калі закон прымуць, ён будзе датычацца толькі грамадзян краін СНД – Азербайджана, Арменіі, Беларусі, Казахстана, Кыргызстана, Малдовы, Расеі, Таджыкістана і Узбекістана.
За адмову даць гэтую інфармацыю або падачу хлуслівых звестак можна будзе атрымаць штраф да 2 тысч еўра, заўважыла выданне Delfi.lv.
Акрамя таго, Камісія па нацыянальнай бяспецы Латвіі распрацавала папраўкі да закона «Аб дзяржаўнай мяжы Латвійскай Рэспублікі», згодна з якімі грамадзянам краін СНД дазвол на знаходжанне ў прымежнай зоне Латвіі будзе выдавацца толькі са згоды Службы дзяржаўнай бяспекі.
Тлумачаць такія новаўвядзенні тым, што пасля ўварвання Расеі ва Украіну, якое падтрымлівае афіцыйная Беларусь, у рэгіёне ўзраслі рызыкі, звязаныя з разведкай і гібрыднымі пагрозамі. Каб прадухіліць уезд у Латвію непажаданых асоб, з лютага 2022 года Латвія ўзмацніла кантроль за міграцыяй. А з улікам таго, што краіны СНД цесна супрацоўнічаюць у сферы бяспекі, эканомікі і культуры, а Расея выкарыстоўвае гэтае супрацоўніцтва для атрымання патрэбнай ёй інфармацыі, Латвія вырашыла працягваць гэтыя меры.
Тэса Анэйда belsat.eu
