Міс Беларусь 2018 года, былая дэпутатка і вядоўца «Калыханкі» Марыя Васілевіч трымала свайго жаніха ў таямніцы. Але цяпер пачала выкладваць фота з вяселля, якое адбылося 8 студзеня 2025 года ў загсе Цэнтральнага раёну Менску.
Мужам Марыі Васілевіч зрабіўся Аляксандр Жылач – былы футбаліст ФК «Узда», які цяпер працуе ў будаўнічай сферы. Ён удзельнічаў у будаўніцтве жытла ў Менску і Менскай вобласці, а таксама ў некаторых рэгіёнах Расеі: Санкт-Пецярбурзе, Уладзімірскай і Калужскай вобласцях. На падставе сацсетак Васілевіч можна зрабіць выснову, што ажаніцца Аляксандр прапанаваў ёй у верасні 2024 года.
Сярод гасцей можна было заўважыць іншых удзельніц конкурсу прыгажосці «Міс Беларусь – 2018»: Марыю Первій, Анастасію Клімовіч, Лідзію Ліс і Анастасію Лаўрынчук. Яны ж ладзілі дзявочнік Васілевіч.
Марыю Васілевіч пасля перамогі ў конкурсе «Міс Беларусь» у 2018 годзе шмат разоў бачылі з Аляксандрам Лукашэнкам: разам яны танцавалі, хадзілі на хакейныя матчы і розныя афіцыйныя падзеі.
А потым 22-гадовая дзяўчына зрабілася дэпутаткай. У гэтай ролі яна распрацоўвала законапраект «Аб адказным абыходжанні з жывёлінамі», дзякуючы якому, у тым ліку, людзям забаранілі ўваходзіць з сабакамі ў крамы і кавярні.
У 2020 годзе яна наведала ў Бальніцы хуткай дапамогі людзей, якія пацярпелі падчас мірных пратэстаў супраць фальсіфікацыі выбараў. Пасля гэтага ейная палітычная кар’ера скончылася.
Летам 2024 года яе зрабілі вядоўцай «Калыханкі» замест Аляксандра Ждановіча (Маляваныча), які вёў гэтую дзіцячую праграму амаль 20 гадоў. Дагэтуль Васілевіч таксама працавала вядоўцай праграмы «Добрай раніцы» на тэлеканале «Беларусь 1».
Тэса Анэйда belsat.eu
