Міністр абароны Злучаных Штатаў Лойд Остын 9 студзеня ў сваім уступным слове падчас 25-й сустрэчы кантактнай групы ў пытаннях абароны Украіны ў нямецкім Рамштайне заявіў пра чарговае вылучэнне сродкаў Кіеву.
Паводле амерыканскага міністра, новы пакет дапамогі Украіне складзе каля 500 мільёнаў долараў.
«Ён уключае ў сябе дадатковыя ракеты для ўкраінскай СПА, больш боепрыпасаў і больш боепрыпасаў класа „паветра-зямля“ і іншага абсталявання для падтрымання ўкраінскіх F-16», – сказаў Лойд Остын.
Ён таксама адзначыў, што «поўны рашучасці зрабіць усё магчымае, каб дапамагчы Украіне жыць ва ўмовах свабоды і бяспекі, а таксама стварыць больш справядлівы і годны свет».
«Вось асноўная ісціна: барацьба Украіны важная для ўсіх нас. Як я сказаў тут, у Рамштайне, на нашай першай сустрэчы ў красавіку 2022 года, вайна Пуціна „з’яўляецца выклікам свабодным людзям ва ўсім свеце“. І мы ўсе зацікаўленыя ў тым, каб аўтакраты не маглі ставіць свае імперскія амбіцыі вышэй за асноўныя правы свабодных і суверэнных народаў. Украіна вядзе справядлівую вайну самаабароны. І гэта адна з найвялікшых справаў нашага часу», – заявіў Остын, міністарскія паўнамоцтвы якога неўзабаве канчаюцца.
Абраны Доналдам Трампам спецпрадстаўнік у пытаннях Украіны і Расеі Кіт Келаг назваў сваёй мэтай на працягу 100 дзён з інаўгурацыі новага прэзідэнта паспрабаваць знайсці рашэнне поўнамаштабнай вайны. Пры гэтым, паводле яго, Трамп «не спрабуе нешта даць [Уладзіміру] Пуціну ці расейцам, ён насамрэч спрабуе выратаваць суверэнітэт Украіны і гарантаваць. І ён будзе гарантаваць, што гэта справядліва і сумленна».
Якуб Хруст belsat.eu
