У ЗША ў выніку буйных пажараў у Каліфорніі было абвешчанае надзвычайнае становішча. Дзясяткі тысячаў асобаў былі эвакуяваныя, паведамляецца пра ахвяры.
На раніцу 9 студзеня вядома пра пяць загінулых у выніку пажараў у Каліфорніі. 130 000 асобаў былі эвакуяваныя ад узбярэжжа Ціхага акіяну да ўнутранай Пасадэны, а больш як 456 000 асобаў засталіся без электрычнасці, піша AP.
У выніку пажараў былі знішчаныя шэраг славутасцяў. Сярод іх – рэстаран морапрадуктаў «Reel Inn» у Малібу і галівудская сярэдняя школа «Palisades Charter High School», што была паказаная ў шмат якіх фільмах, уключаючы фільм жахаў 1976 года «Кэры» і тэлесерыял «Ваўчаня». Некалькі галівудскіх студыяў прыпынілі вытворчасць, а «Universal Studios» закрыла свой тэматычны парк паміж Пасадэнай і Пасіфік-Пэлісэйдс.
На ціхаакіянскім узбярэжжы на захад ад цэнтру Лос-Анджэлеса буйны пажар зраўнаваў з зямлёю цэлыя кварталы. У Пасадэне ў выніку пажараў былі пашкоджаныя або страчаныя ад 200 да 500 будынкаў, у Пасіфік-Пэлісэйдс згарэла не менш як 1000 будынкаў. Пра страту сваіх дамоў заявілі ў тым ліку зоркі Мэндзі Мур, Кэры Элўэс і Пэрыс Гілтан.
Агулам пажары ахапілі каля 108 квадратных кіламетраў. Прэзідэнт Джо Байдэн падпісаў федэральную дэкларацыю аб надзвычайным становішчы. На тушэнне пажараў прыбылі сотні пажарных з іншых штатаў. Але надвор’е не давала гасіць узгаранні.
Мэр Лос-Анджэлеса Кэрэн Бас заявіла, што тушэнне пажараў сутыкаецца з няўстойлівымі вятрамі, якія «раскідвалі вуголле на некалькі міляў наперадзе агню». Полымя распаўсюджвалася так хутка, што шмат хто ледзь паспявалі выратавацца. Месцамі, у тым ліку ў Галівудзе, дарогі рабіліся непраезнымі, і людзі кідалі свае машыны і беглі пешшу.
Паводле апошніх звестак, сезон лясных пажараў у Каліфорніі пачынаецца раней і заканчваецца пазней праз павышэнне тэмпературы і памяншэнне колькасці ападкаў, звязаных са змяненнем клімату. Дажджы, што звычайна сканчаюць пажарны сезон, часта затрымліваюцца, што азначае, што пажары могуць бушаваць на працягу зімовых месяцаў.
Сухія вятры спрыялі павышэнню тэмпературы вышэй за сярэднюю ў Паўднёвай Каліфорніі, дзе з пачатку траўня не выпадала больш як 2,5 міліметра ападкаў.
8 студзеня хуткасць ветру павялічылася да 129 км/г. Сіноптыкі прагназуюць парывы ветру да 56–88 км/г, што могуць узмацніцца ў гарах і перадгор’ях. Пажарная абстаноўка можа захавацца да 10 студзеня.
Якуб Хруст belsat.eu
