Кандыдатка на прэзідэнцтва ў Беларусі Ганна Канапацкая абнавіла спіс сваіх давераных асобаў на выбарах 2025 года, у якім цяпер 25 чалавек. Адным з іх нечакана зрабіўся Ілля Дабратвор – актывіст БНФ, які доўгі час жыве ў Варшаве. Як так сталася і як ён збіраецца дапамагаць беларусам замежжа галасаваць, чытайце ў нашай размове.
Ілля Дабратвор кажа, што сам прапанаваў дапамогу Канапацкай, бо дзейнасць «Каардынацыйнай рады і Святланы Ціханоўскай не дае ніякіх вынікаў».
«Для Ганны гэта было важна, што давераная асоба будзе менавіта там, дзе тыя выбарнікі, якія хочуць вярнуцца ў Беларусь і ездзіць у Беларусі, але не стала вяртацца. Гэтае пытанне востра стаіць для беларусаў, якія вымушаныя былі з’ехаць. Таму я памеркаваў, што трэба нешта зрабіць у тым кірунку, бо відавочна, што таго, што робіць Каардынацыйная рада і Святлана Ціханоўская, недастаткова, бо не дае ніякіх вынікаў», – каментуе «Белсату» Дабратвор.
На пытанне, чым яго прывабіла прадвыбарчая праграма Канапацкай, ён мала што здолеў апавесці:
«У 2020 годзе толькі яна адказала «ўкраінскі» на пытанне «чый Крым?». У Ганны прабеларуская праграма, якая можа быць крыху не «праеўрапейскай», але «прабеларускай», – кажа ён.
Дарэчы, мірныя пратэсты беларусаў у 2020 годзе супраць «бязвыбараў» Дабратвор лічыць памылкаю:
«2020 год быў памылкай, якую мы мусім прызнаць. Тое, што мы рабілі 20 гадоў, было знішчана фактычна за паўгода».
Што канкрэтна Дабратвор будзе рабіць у якасці даверанай асобы для беларусаў замежжа? Выгдядае, пакуль ён дакладна гэтага не ведае, хоць да выбараў застаецца 1,5 месяца.
Пра тое, што беларусаў пазбавілі права галасаваць за межамі краіны, ён ведае, але вінаваціць у гэтым палякаў: кажа, «гэта была іхная іныцятыва [закрыць межы]». Развязанне прапануе такое: пікеты ў Варшаве за Канапацкую і прапанова польскім уладам зняць санкцыі з Беларусі.
«Мы будзем ладзіць пікеты ў Варшаве, можа, з «нармальнымі» польскімі партыямі (напрыклад, з «Канфедэрацыяй») зробім пікет у цэнтры Варшаве, каб звярнуць увагу да гэтай праблемы. Польскія улады першыя павінны «закінуць тый мяч» і зняць санкцыі, якія б’юць не па ўладах, а па звычайных беларусах», – каментуе Дабратвор.
Меркаванне беларускай дыяспары замежжа наконт сваёй асобы яго не цікавіць:
«Як мы бачылі з выбараў у Кардынацыйную раду, гэта каля шасці тысяч беларусаў з усяго свету. Цікавіць мяне іхнае меркаванне? Прабачце, не. Мяне цікавіць меркаванне бальшыні: тых 400 тысяч беларусаў, якія не хочуць слухаць Ціханоўскай і Кардынацыйнай рады і хочуць вярнуцца дадому».
Ілля Дабратвор – беларускі актывіст, былы журналіст-фрылансер. Быў кіраўніком выбарчага штабу Валерыя Цапкалы ў час выбараў 2020-га. Праз палітычныя рэпрэсіі быў вымушаны пакінуць Беларусь.
Тэса Анэйда belsat.eu
