Вайсковы лётчык Сяргей Алдасеў можа атрымаць да 4 гадоў калоніі.
У судзе Лідскага раёну 9 студзеня 2025 годзе распачнецца суд над Сяргеем Алдасевым, якому інкрымінуецца публічная знявага Аляксандра Лукашэнкі. За гэта паводле артыкулу 368 ч. 1 Крымінальнага кодэксу Беларусі яму пагражае пакаранне ад штрафу да пазбаўлення волі на тэрмін да 4 гадоў.
«BELPOL» пацвердзіў «Нашай Ніве», што ў Беларусі жыве толькі адзін Сяргей Аляксеевіч Алдасеў. Гэта 38-гадовы лётчык, які ў 2020 годзе служыў у 61-й знішчальнай авіяцыйнай базе ў Баранавічах.
Алдасеў скончыў авіяцыйны факультэт Вайсковай акадэміі Беларусі. Ягоным аднакурснікам быў пасмяротны Герой Беларусі Андрэй Нічыпорчык, які загінуў у 2021 годзе, адводзячы няспраўны Як-130 ад жылых дамоў у Баранавічах.
Алдасеў у 2018-м атрымаў кваліфікацыю вайсковага лётчыка другога статусу – быў падрыхтаваны да вядзення баявых дзеянняў днём у складаных метэаўмовах і ўначы ў простых метэаўмовах. На той момант у яго было званне маёра.
Ці служыў Сяргей Алдасеў пасля 2020 года, невядома.
Нагадаем, у 2024 годзе ва ўсёй Беларусі адбылося не менш за 5890 судоў паводле палітычных адміністратыўных артыкулаў. І гэта амаль на 2000 судовых працэсаў болей, чым у 2023-м.
Тэса Анэйда belsat.eu
