«На святы пераядаюць амаль усе, і гэта нармальна», – супакоіла ў размове з «Белсатам» дыетолаг Алеся Трыфан. Яна параіла, што рабіць, калі хочацца пазбыцца лішняй вагі, якая прыходзіць разам з святочнымі днямі.
Навагодні стол, што ломіцца ад страваў, – традыцыя з даўняга часу, гэта сімвал дабрабыту. «Значыцца, сям'я квітнее, мае ўсё неабходнае», – кажа нутрыцыёлаг, дыетолаг Алеся Трыфан. Яна называе святочны стол спосабам камунікацыі і яднання людзей, якія даўно не бачыліся, абменьваюцца навінамі, падтрымоўваюць адно аднаго: «Харчы выступаюць мастком, што ўмацоўвае гэтую сувязь».
Да таго ж свята – легальны спосаб расслабіцца і адкінуць усе абмежаванні, якіх у жыцці багата.
У гэты час пераядаюць усе, нічога дзіўнага тут няма, супакойвае суразмоўца:
,,«Нават калі вы знянацку за святы крыху набралі, то найлепшы і найхутчэйшы спосаб пазбыцца гэтых набраных кілаграмаў – проста вярнуцца да звыклага ладу жыцця. Не варта панікаваць, садзіцца на дыеты. Гэта, дарэчы, наадварот, можа толькі прывесці да бясконцага кругазвароту, які будзе прыводзіць да ўсё большаму набору вагі».
Трыфан запэўнівае, што вага нармалізуецца, як толькі будуць узноўленыя штодзённыя звычкі: «Дазвольце свайму целу адаптавацца, і вы заўважыце, як яно пакрысе самастойна прыйдзе да свайго нармальнага стану».
Разгрузачныя дні і сталыя ўзважванні толькі дададуць стрэсу, таму мардаваць сябе гэтым адмыслоўца не раіць.
Агулам, як растлумачыла дыетолаг, важна харчавацца збалансавана. Вядома, вага хутчэй набіраецца, калі есці высокакаларыйныя стравы:
«Галоўны чыннік – гэта не пэўныя прадукты, а пераяданне або мізэрнае харчаванне, незбалансаванае, і зніжэнне актыўнасці, што часта суправаджае нашыя святы. Нават самыя дыетычныя стравы, калі імі пераядаць, прыводзяць да набору вагі».
Сцяпан Кубік belsat.eu
