«Год беларускай мовы» прапаноўваў абвясціць кіраўнік адміністрацыі Лукашэнкі Дзмітрый Крутой. Лукашэнка пастанавіў, што «Пяцігодка якасці» важнейшая.
У навагоднім звароце 31 снежня 2024 года Аляксандр Лукашэнка абвясціў «Пяцігодку якасці», а 2025 год – «Годам добраўпарадкавання Беларусі». Такім чынам, ён не прыняў прапанову кіраўніка сваёй адміністрацыі Дзмітрыя Крутога.
Крутой у кастрычніку казаў, што ў Беларусі існуе вялікі запыт на навучанне па-беларуску, і згадваў, як сам вучыўся ў беларускамоўнай школе.
У Беларусі на сёння каля 40 % школаў беларускамоўныя, ды ў іх праходзяць навучанне толькі каля 10 % усіх вучняў. Колькасць вучняў, якія атрымліваюць адукацыю па-беларуску, няўхільна зніжаецца: у 1994–1995 гадах па-беларуску ў школах навучаліся 29,4 % вучняў, у 2007–2008 гадах – 20,9 %…
Намеснік міністра адукацыі Беларусі Аляксандр Кадлубай назваў такую сістэму «абсалютна ўраўнаважанай з гледзішча моваў». Ды эксперты не чакаюць рэальных захадаў цяперашніх уладаў на карысць роднай мовы. У навагоднім звароце Святланы Ціханоўскай разыгралі сцэнку з размовамі звычайных беларусаў – тыя сярод іншага казалі, што лічаць небяспечным публічна размаўляць у Беларусі па-беларуску.
2024 год Лукашэнка абвяшчаў «Годам якасці», 2023-і – «Годам міру і стварэння», 2022-і – «Годам гістарычнай памяці», 2021-ы – «Годам народнага адзінства». Нягледзячы на гэта, у Беларусі застаюцца праблемы і з народным адзінствам, і з гістарычнай памяццю, і з мірным небам, і з якасцю прадукцыі.
Лукашэнка і сам заўважаў, што «Год якасці» пайшоў неяк не так: маўляў, «не гучыць», таму «краіна гэтым і не жыве».
Алесь Наваборскі belsat.eu
