Паўночнаатлантычны альянс абвесціў пра намер узмацніць сваю вайсковую прысутнасць у Балтыйскім моры з мэтай папярэджання патэнцыйных пагрозаў для крытычна важнай падводнай інфраструктуры.
Нагодаю для рашэння аб узмацненні вайсковай прысутнасці паслужыла пашкоджанне кабелю «EstLink 2», які злучае Эстонію і Фінляндыю.
Гэты інцыдэнт цяпер расследуе Фінляндыя, і ён, разам з іншымі падобнымі выпадкамі, разглядаецца як сабатаж.
,,«Каб падтрымліваць пільнасць, падвышаць сітуацыйную абазнанасць і перадухіляць будучыя інцыдэнты, NATO ўзмацняе сваю вайсковую прысутнасць у Балтыйскім моры», – гаворыцца ў паведамленні Альянсу.
Пры падтрыманні Марскога цэнтру для бяспекі крытычнай падводнай інфраструктуры, створанага NATO сёлета ў траўні, разглядаюцца таксама іншыя захады дзеля перадухілення сабатажу.
25 снежня ў Балтыйскім моры быў пашкоджаны сілавы кабель «EstLink 2» паміж Фінляндыяй і Эстоніяй. Фінляндыя арыштавала танкер ценявога флоту РФ паводле падазрэння ў дыверсіі. На караблі было знойдзенае шпіёнскае абсталяванне.
Паліцыя Фінляндыі заявіла, што знайшла на дне Фінскай затокі след ад якара, які мог належыць нафтаваму танкеру «Eagle S», што ўваходзіць у ценявы флот Расеі.
17–18 лістапада 2024 года ў Балтыйскім моры былі пашкоджаныя два падводныя тэлекамунікацыйныя кабелі: адзін з іх злучае Фінляндыю з Нямеччынай, другі – Швецыю з Літвой. Пасля абрыву кабеляў затрымалі кітайскі сухагруз «Yi Peng 3». Яго западозрылі ў тым, што ён наўмысна некалькі гадзінаў цягнуў якар па дне, каб пашкодзіць кабелі. Следчыя лічаць, што за гэтым стаіць расейская выведка.
Марыя Міхалевіч belsat.eu
