Ужо праз некалькі гадзінаў мы пачнём сустракаць новы год. Як заўсёды, запрашаем правесці гэты вечар у кампаніі ўлюбёных музыкаў і вядоўцаў! А вось што мы для вас падрыхтавалі.
21:30 Святочна-гістарычная віктарына ад праграмы «Вусы Скарыны». Адмыслова на Новы год мы змянілі звыклы фармат на забаўляльнае шоу! Мікіта Мелказёраў, Марына Ментусава, Ліза Ветрава і Аляксандр Івулін будуць адказваць на пытанні Цімафея Акудовіча і спаборнічаць за ўзнагароду найлепшага знаўцы гісторыі.
22:15 Святочнае выданне праграмы «Хай Так ТВ» збярэ на Новы год зорную каманду існых і былых вядоўцаў, якія падрыхтавалі для гледачоў шмат жартаў, музычных падарункаў і вясёлых неспадзяванак. Незабыўную атмасферу, шмат смеху і добры настрой гарантуем!
22:50 Музычны вечар распачне Дзяніс Дудзінскі. Навагодні канцэрт з удзелам Лявона Вольскага, «J:Mors», «РСП», Zui, «Kriwi», Ketevan, Георгія Дабро, Pomidoroff, Lear.
За 10 хвілінаў да новага года глядзім зварот Святланы Ціханоўскай. Адкаркоўваем шампанскае, загадваем жаданні, віншуем блізкіх. І ўрываемся ў новы, 2025 год з шалёным dj-сэтам ад PapaBo.
00:35 Святочны канцэрт ад праграмы «Мова нанова» перанясе нас на сапраўднае традыцыйнае застолле. Улюбёныя народныя бяседныя песні праспяваем разам. Пагатоў усё гэта будзе адбывацца ў фармаце караоке.
Музыка, песні, танцы да самай раніцы!
Тэлеканал «Белсат» зычыць вам шчаслівага Новага года! Застаёмся разам у 2025-м! Самае цікавае – наперадзе!
