З 1 студзеня 2025 года ў Бельгіі будзе забаронены продаж аднаразовых электронных цыгарэтаў. Міністэрства аховы здароўя каралеўства сцвярджае, што яны небяспечныя для здароўя і наваколля, піша Euronews.
Паводле міністра аховы здароўя Бельгіі Франка Вандэнбруке, недарагія вэйпы – пагроза для здароўя, бо праз іх падлеткі лёгка ўцягваюцца ў паленне, паколькі маркетынг электронных цыгарэтаў арыентаваны пераважна на моладзь.
«Аднаразовыя электронныя цыгарэты – новы прадукт, створаны для прыцягнення новых спажыцоўцоў. Электронныя цыгарэты часта ўтрымліваюць нікацін. Нікацін выклікае залежнасць. Нікацін шкодны для здароўя, гэта факт», – зазначае Вандэнбруке.
Супраць вэйпінгу выступаюць таксама Фонды барацьбы з анкалогіяй Бельгіі.
Бельгія стане першай краінай у Еўропе, якая забароніць аднаразовыя электронныя цыгарэты.
,,«Мы заклікаем Еўрапейскую камісію выступіць з новымі ініцыятывамі па абнаўленні і мадэрнізацыі тытунёвага заканадаўства», – кажа міністр аховы здароўя каралеўства.
Бельгійскія ўлады таксама звяртаюць увагу на тое, што пластык, батарэйкі і мікрасхемы, якія ўваходзяць у склад вэйпаў, негатыўна ўплываюць на экалогію.
Прадаўцы электронных цыгарэтаў у Бельгіі думаюць над альтэрнатыўнымі рашэннямі, якія дапамогуць пазбегнуць стратаў пасля забароны. Напрыклад, плануюць выкарыстоўваць сістэму pod, што папярэдне запаўняецца вадкасцю і ўстаўляецца ў шматразовую электронную цыгарэту, якую можна пераладоўваць.
Сёлета незаконным продаж вэйпаў па-за аптэкамі абвесціла Аўстралія – там увялі самыя жорсткія ў свеце абмежаванні на продаж электронных цыгарэтаў.
Напрыканцы траўня 2024 года законапраект аб поўнай забароне на продаж вэйпаў і вадкасцяў для іх быў унесены ў расейскую Дзярждуму.
У красавіку 2024 года продаж і рэклама вэйпаў былі забароненыя ў Казахстане.
Забараніць вэйпы хочуць і ў Беларусі – пра гэта неаднойчы казалася ў праўладных смі. Беларускія лекары згодныя, што вэйпы – шкодныя для здароўя, а таксама распавядаюць, што дзеці ў нашай краіне пачынаюць паліць электронныя цыгарэты ўжо ў малодшых класах.
Марыя Міхалевіч belsat.eu
