З 19 ліпеня 2024 года ў Беларусь уехалі 15 546 замежнікаў з 35 краінаў, уключаных у спіс пашыранага бязвізу, паведамляе Беларускі памежны камітэт.
За апошні тыдзень снежня ў бязвізавым парадку беларускую мяжу перасеклі 6140 грамадзянаў 38 еўрапейскіх дзяржаваў.
Агулам з 15 красавіка 2022 года Беларусь наведалі 1 030 425 жыхароў Еўропы. Найбольш турыстаў было з Літвы – 586 382 асобы. На другім месцы – Латвія, адкуль прыехалі 324 746 чалавек. З Польшчы паводле бязвізу ў нашую краіну заехаў 103 751 турыст.
Таксама, паводле Памежнага камітэту, бязвізавы ўезд у Беларусь карыстаецца папулярнасцю ў жыхароў Нямеччыны, Эстоніі, Італіі, Францыі і Вялікай Брытаніі.
Грамадзяне 38 еўрапейскіх краінаў могуць наведваць Беларусь без візаў да 31 снежня 2025 года.
З 15 красавіка 2022 года бязвізавы рэжым дзее для жыхароў Латвіі і Літвы, з 1 ліпеня таго ж года – для жыхароў Польшчы.
19 ліпеня 2024 года ўлады Беларусі пашырылі бязвіз на грамадзянаў яшчэ 35 краінаў Еўропы. Большасць з іх рэжым Лукашэнкі ўважае за «несяброўскі», бо яны ўвялі санкцыі або далучыліся да іх.
Урады Польшчы, Літвы і Латвіі неаднойчы заклікалі сваіх грамадзянаў устрымацца ад паездак у нашую краіну ў сувязі з высокай рызыкаю затрымання і ціску.
Марыя Міхалевіч belsat.eu
