Святар прыйшоў на імпрэзу вайскова-патрыятычнага клубу ў Лёзне, дзе дзяцей вучылі маліцца і збіраць зброю. Гэта адбывалася проста ў школе імя М. В. Акцябрскай. На падзею звярнула ўвагу «Хрысціянская візія».
Гэтым святаром быў настаяцель храма Узвышэння Святога Крыжа іерэй Вячаслаў Пашкевіч. Ён павіншаваў і блаславіў новых удзельнікаў ваенна-патрыятычнага клуба «Штурм».
«Мы робім усё магчымае і молімся, каб на нашай зямлі квітнеў мір і дабрабыт. Хлопцы, сёння ваш дзень. Памятаеце, што ўсякая добрая справа пачынаецца з малітвы Госпаду», – сказаў святар.
Дзеці падчас мерапрыемства збіралі зброю.
Іерэй Вячаслаў акрапіў прысутных святой вадой, а потым правёў экскурсію ў храме Узвышэння Святога Крыжа. Дзецям раздалі свечкі, каб яны паставілі іх за здароўе родных. Кожнае дзіця атрымала на памяць абраз Георгія Перамаганосца.
Ваенна-патрыятычны клуб «Штурм» супрацоўнічае з РАУС. Клуб створаны пры садзейнічанні 103-й віцебскай асобнай гвардзейскай паветрана-дэсантнай брыгады. Напярэдадні прэзідэнцкіх выбараў у 2020 годзе яе наведаў Аляксандр Лукашэнка, адзначае «Хрысціянская візія».
Арсен Рудэнка belsat.eu
