Прэзідэнт Украіны Уладзімір Зяленскі пагаварыў па тэлефоне з прэзідэнтам Азербайджана Ільхамам Аліевым. Зяленскі выказаў спачуванні яму і азербайджанскаму народу ў сувязі з катастрофай рэйса «Azerbaijan Airlines» 25 снежня ў Казахстане.
«Мы адзначылі гераізм пілотаў і ўсяго экіпажа самалёта, – паведамляе прэс-служба Зяленскага. – Ключавым прыярытэтам цяпер з'яўляецца дбайнае расследаванне, якое дасць адказы на ўсе пытанні аб тым, што адбылося насамрэч. Расея павінна даць выразныя тлумачэнні і спыніць распаўсюджваць дэзінфармацыю. На фота і відэа выразна бачныя пашкоджанні фюзеляжа самалёта, у прыватнасці прабоіны і ўвагнутасці, якія вельмі нагадваюць удар ракетай СПА».
Украіна гатовая падтрымаць Азербайджан у гэтай сітуацыі ўсімі неабходнымі сродкамі і заклікае іншыя краіны таксама аказаць дапамогу.
Па словах Уладзіміра Зяленскага, прэзідэнты таксама дамовіліся актывізаваць двухбаковыя кантакты ў бліжэйшы час.
Да размовы Зяленскага з Ільхамам Аліевым, прэзідэнт Азербайджана пагаварыў па тэлефоне з Уладзімірам Пуціным. Той папрасіў прабачэння за тое, што «трагічны інцыдэнт адбыўся ў паветранай прасторы Расеі».
У паведамленні Крамля адзначалася, што на Грозны, куды ішоў рэйс, які пацярпеў крушэнне, адбылася атака дронаў.
«Euronews» са спасылкай на азербайджанскую крыніцу паведамляе, што самалёт быў пашкоджаны СПА.
Арсен Рудэнка belsat.eu
