У Нацыянальны гістарычны архіў Беларусі ў Горадні яшчэ 23 снежня на пасаду дырэктара прызначылі адстаўнога вайскоўца – Аляксандра Вянсковіча.
Як паведамляе сайт «Архівы Беларусі», Вянсковіч больш за 26 гадоў адслужыў ва Узброеных сілах Рэспублікі Беларусь, з’яўляўся начальнікам кірунку прызыву на ваенную службу ваенкамату па Гарадзенскай вобласці. Быў узнагароджаны дзяржаўнымі ўзнагародамі «За бездакорную службу» ІІ і ІІІ ступеняў.
Раней былыя сілавікі занялі пасады дырэктароў Нацыянальнага гістарычнага архіву Беларусі, Беларускага дзяржаўнага архіву навукова-тэхнічнай дакументацыі, Беларускага навукова-даследчага цэнтру электроннай дакументацыі.
Нацыянальным гістарычным архівам з 2023 года кіруе былы супрацоўнік КДБ Міхаіл Глушакоў. Праз два дні пасля ягонага прызначэння былі затрыманыя некалькі супрацоўнікаў архіву, пазней былі звольненыя 8 чалавек.
Таксама ўжо амаль два гады былы сілавік – генерал-маёр Алег Воінаў – узначальвае Дэпартамент па архіўнай справе і справаводстве Міністэрства юстыцыі. Да гэтага ён быў дырэктарам Нацыянальнага гістарычнага архіву – пры ім паводле палітычных матываў звольнілі больш за 15 супрацоўнікаў.
Марыя Міхалевіч belsat.eu
