Пракуратура Калінкавіцкага раёну Гомельскай вобласці дамаглася прызнання YouTube-каналу «Elgar» экстрэмісцкімі матэрыяламі.
YouTube-канал размяшчаў відэаролікі пра тое, як легальна не служыць у войску Беларусі ды Расеі, прыводзіў прыклады і прапаноўваў кансультатыўныя паслугі, у тым ліку платныя.
«Функцыянаванне падобнага YouTube-каналу перашкаджала дзейнасці Міністэрства абароны Рэспублікі Беларусь у частцы камплектавання Узброеных сілаў і вайсковых фармаванняў прызыўнымі рэсурсамі. Размешчаная інфармацыя прыніжала значэнне запэўнівання бяспекі грамадства і дзяржавы, выканання грамадзянамі канстытуцыйнага абавязку абароны Рэспублікі Беларусь і падрывала ў грамадстве, у тым ліку ў прызыўнікоў, пачуццё патрыятызму», – заявілі ў пракуратуры.
Суд задаволіў заяву пракурора, а Міністэрству інфармацыі загадалі ўнесці рэсурс у рэспубліканскі спіс экстрэмісцкіх матэрыялаў.
У Беларусі сёлета былі змененыя законы аб абароне, аб вайсковым абавязку і вайсковай службе, аб мабілізацыйнай падрыхтоўцы і мабілізацыі, аб ваенным становішчы і іншыя. Цяпер пра неабходнасць яўкі ў ваенкамат могуць апавяшчаць SMS-паведамленнямі. Таксама павялічваюцца штрафы за няяўку на мерапрыемствы прызыву, а ваенкаматы могуць абмяжоўваць выезд за мяжу грамадзянаў, якія парушаюць абавязкі вайсковага ўліку і ўхіляюцца ад прызыву.
Асобна прапісанае з’яўленне апарату ўзмацнення – грамадзянаў, якія прыцягваюцца для дапамогі вайсковым камісарыятам, органам дзяржаўнай бяспекі пры правядзенні прызыву і адпраўцы мабілізаваных у вайсковыя фармаванні.
Якуб Хруст belsat.eu
