Як паведамляе МУС Беларусі, супрацоўнікі ГУБАЗіК і атраду «Шторм» спынілі аўтамабіль 46-гадовага берасцейца. Пасля таго як нібыта былі прадстаўленыя пасведчанні, кіроўца замкнуўся ў машыне і адмовіўся выходзіць. А потым паспрабаваў уцячы на аўтамабілі, наехаўшы пры гэтым на аднаго з сілавікоў.
Кіроўцу затрымалі ў прыватным сектары Берасце. МУС сцвярджае, што ягоныя дзеянні «неслі рэальную пагрозу для навакольных», таму сілавікі «здзейснілі прыцэльныя стрэлы па аўце».
«Парушальнік атрымаў нязначныя траўмы, яму надалі неабходную медычную дапамогу», – піша МУС.
Таксама сілавікі паведамляюць, што на месцы жыхарства мужчыны нібыта знайшлі светлашумавыя гранаты і ёмістасць з рэчывам, падобным да пораху. Пры гэтым МУС не апублікавала ніякіх фота ці відэа-доказаў таго, як адбывалася затрыманне ці страляніна.
Супраць берасцейца распачалі крымінальную справу паводле артыкулу аб гвалце або пагрозе прымянення гвалту ў дачыненні супрацоўніка органаў унутраных справаў.
Тэса Анэйда belsat.eu
