Праваабаронцам стала вядома пра выпадкі прымушэння чарговы раз «дабраахвотна кампенсаваць» данаты. Гэтыя звесткі з’явіліся на фоне таго, што асобаў, якія ўжо заплацілі такую кампенсацыю, пачалі выклікаць у пракуратуру.
Калі раней беларусы «кампенсавалі» данаты пасля размоваў з КДБ, то гэтым разам, сцвярджаюць праваабаронцы «Вясны», цікавасць да гэтых асобаў з’явілася ў ГУБАЗіКу і ДФР.
Беларусам паказваюць, што знайшлі іхныя іншыя данаты і зноў патрабуюць заплаціць за іх.
«Тое, што людзі раней «кампенсавалі» свой данат у КДБ, іх не цікавіць – маўляў, гэта іншае ведамства і іншая справа», – піша «Вясна».
Нагадаем, што сёння з’явілася інфармацыя пра тое, што асобаў, якіх раней прымусілі кампенсаваць данаты структурам і асобам, не пажаданым для ўладаў, пачалі выклікаць у пракуратуру.
Практыка «кампенсацыі» данатаў у Беларусі даволі пашыраная. У сілавікоў ёсць нават каэфіцыенты, паводле якіх розныя людзі плоцяць розныя сумы. Як расказала «Белсату» дзяўчына, якая прыехала ў Беларусь на выходныя, а апынулася на «размове» ў КДБ і была вымушаная заплаціць 500 долараў, на «размовы» ў КДБ стаялі чэргі людзей. Ёй як нібыта парушальніцы, але не зацятай, сказалі, што заплаціць трэба ў 50 разоў больш, чымся яна заданаціла. Гэта назвалі мінімальным каэфіцыентам.
Раман Шавель belsat.eu
