У казахскім горадзе Актаў разбіўся пасажырскі самалёт. Папярэдне паведамляецца пра тых, хто выжыў. Інфармацыя пра пацярпелых удакладняецца, паведамляе МНС Казахстану.
«У Актаў на месца крушэння самалёта прыбылі 52 чалавекі асабовага складу і 11 адзінак тэхнікі МНС Казахстану. Па прыбыцці выяўленае гарэнне паветранага судна. Выратавальныя падраздзяленні прыступілі да тушэння пажару. У цяперашні час удакладняецца інфармацыя пра пацярпелых, папярэдне паведамляецца, што ёсць тыя, хто выжыў», – піша МНС Казахстану.
Выданне «Власть» са спасылкай на Міністэрства транспарту Казахстану піша, што катастрофа напаткала рэйсавы самалёт «Azerbaijan Airlines», які рухаўся маршрутам Баку – Грозны.
Некаторыя медыі паведамляюць, што на борце было 67 пасажыраў і пяць чальцоў экіпажу.
Афіцыйна прычыны катастрофы пакуль не паведамляюцца.
Абноўлена. МНС Казахстану пацвердзіла, што на борце былі 67 пасажыраў і пяць чальцоў экіпажу. Паводле пярэдняй інфармацыі, выжылі 25 чалавек, з іх 22 асобы дастаўленыя ў шпіталь.
Арсен Рудэнка belsat.eu
