Беларускую мову ва Украіне могуць выключыць са спісу тых, што падлягаюць абароне і падтрыманню. Адпаведны законапраект прыняў урад, цяпер яго мае зацвердзіць Вярхоўная Рада Украіны.
Урад Украіны зацвердзіў праект закону, што ўносіць змены ў некаторыя нарматыўныя акты ў сувязі з абнаўленнем афіцыйнага перакладу Еўрапейскае хартыі рэгіянальных або мінарытарных моваў. Пра гэта паведаміў прадстаўнік Кабінету Міністраў у Вярхоўнай Радзе Тарас Мельнічук.
У праекце прапануецца абнавіць пералік моваў, што будуць мець падтрыманне і асаблівую абарону згодна з палажэннямі Хартыі. Да іх належаць балгарская, вугорская, гагаузская, крымска-татарская, навагрэцкая, нямецкая, польская, румынская, славацкая, чэшская і іўрыт.
Аднак расейская і беларуская мовы, што раней таксама былі ўлучаныя ў гэты спіс, у новым праекце закону не згадваюцца.
Цяпер гэты законапраект будзе разглядаць Вярхоўная Рада.
У 1992 годзе адзінаццаць краінаў – сябраў Рады Еўропы падпісалі Еўрапейскую хартыю рэгіянальных моваў і моваў меншасцяў. Сёння гэтая канвенцыя ахоплівае 25 дзяржаваў і распаўсюджваецца на каля 80 рэгіянальных моваў або моваў меншасцяў, заахвочваючы іх актыўнае выкарыстанне ў адукацыі, юстыцыі, кіраванні, медыях, культуры, эканамічным і сацыяльным жыцці і трансгранічнай супрацы.
Украіна ратыфікавала Хартыю ў 2003 годзе.
Таксама глядзіце ў выданні:
Раман Шавель belsat.eu
