У пад'ездзе шматкватэрнага дома ў Баранавічах’ мужчына спаліў плюшавага мядзведзя, а потым спалохаўся і скокнуў з вакна.
Як паведамляе «Еўрарадыё» са спасылкай на брэсцкую міліцыю, падпаліць мядзведзя ў пад'ездзе 36-гадовага жыхара Баранавічаў падштурхнуў канфлікт з сужыцелькай.
Ён, нібыта, вярнуўся дадому ноччу і быў п'яны, што вельмі не спадабалася жанчыне. Чамусьці мужчына вырашыў знішчыць плюшавага мядзведзя, які належаў яму, і падпаліў яго ў пад'ездзе. Але, калі пачаўся пажар, спалохаўся наступстваў, таму выйшаў праз вакно сваёй кватэры на першым паверсе.
Мужчыну знайшлі міліцыянты. Патлумачыць, навошта ён вырашыў падпаліць мядзведзя, мужчына не змог. Распачатая крымінальная справа.
Узгаранне ў пад'ездзе часткова ліквідавалі мясцовыя жыхары, часткова ратавальнікі, якіх выклікалі на месца здарэння. Камунальнікі ацанілі шкоду ў 140 рублёў.
Надзея Вольная belsat.eu
