Штодня «Белсат» адкрываў для чытачоў новыя цікавінкі пра вядомых беларусаў і беларусак у сваім адвэнт-календары. Сёння прыйшла чарга апошняга акенца.
№ 24 святочнага календара прысвечаны нашай галоўнай гераіне – лідарцы дэмакратычных сілаў і абранай прэзідэнтцы Беларусі Святлане Ціханоўскай.
У 2020 годзе Святлана пайшла на прэзідэнцкія выбары замест арыштаванага мужа Сяргея Ціханоўскага. Паводле платформы «Голас», за яе прагаласавалі не менш за 56 % выбарнікаў з улікам рэальнай яўкі, тым часам як за Лукашэнку – 34 %.
У тым жа годзе Святлана Ціханоўская ў выніку пераследу была вымушаная з’ехаць з Беларусі і дагэтуль працягвае змагаецца за дэмакратыю ў нашай краіне ў якасці кіраўніцы Аб’яднанага пераходнага кабінету Беларусі. Лукашэнкаўскі рэжым завочна пакараў яе 15 гадамі пазбаўлення волі.
Сяргей Ціханоўскі застаецца за кратамі з 2020 года: рэжым Лукашэнкі даў яму амаль 20 гадоў пазбаўлення волі, больш за два гады ад Сяргея няма ніякіх вестак.
Шчырыя адказы Святланы Ціханоўскай глядзіце ніжэй.
1. Галоўная падзея гэтага года для вас: Сустрэчы з лідарамі G7, стратэгічныя дыялогі з ЗША, Канадай, ЕЗ. Умацавалі адносіны з саюзнікамі
2. Апішыце гэты год адным словам: Год – пераадоленне
3. Якім персанажам на Каляды вы б апрануліся? Я б хацела проста пабыць мамай, побач са сваімі дзецьмі. Я іх цяпер так рэдка бачу
4. Самы шчаслівы момант 2024 года: Кожная навіна пра вызваленне людзей з-за кратаў
5. А галоўны фэйл? Што пакуль не перамаглі. Але працуем далей
6. З кім з беларусаў вы хацелі б пазнаёміцца? З аўтарамі ТГ-каналу «Советская Белоруссия»
7. Якая песня ў вас гучала часцей за ўсё ў гэтым годзе? «Мама» (Naviband) – я нават навучылася граць яе на піяніна
8. Хто з беларусаў стаў для вас асабістым адкрыццём года? Аўтары праграмы «Саша, что ты несёшь» – Фёдар Паўлючэнка і Аляксандр Атрошчанкаў, а таксама Глеб Сямёнаў і Іван Прус, якія робяць «О(б)суждаем»
9. Ваш любімы калядны фільм: «Адпачынак па абмене» (The Holiday)
10. Якую галоўную параду вы б далі сабе пяць гадоў таму? Больш часу праводзіць з сям’ёй, бо гэта і ёсць шчасце
11. Вашая мара на наступны год: Каб выйшлі на волю ўсе палітвязні. Пабачыць і абняць свайго мужа
12. Што б вы пажадалі беларусам у новым годзе? Не апускаць рук!
Дарагія чытачы «Белсату»! Дзякуй, што заставаліся з намі ў гэтыя снежаньскія дні! Віншуем з надыходам святаў і верым, што ўсе пажаданні герояў нашага адвэнту абавязкова здзейсняцца!
Тэса Анэйда belsat.eu
