Паўночная Карэя, імаверна, рыхтуецца дадаткова адправіць сваіх вайскоўцаў у Расею для ўдзелу ў вайне супраць Украіны, а таксама даставіць вайсковую тэхніку, у тым ліку дроны-камікадзэ. Пра гэта паведамляюць паўднёвакарэйскія вайскоўцы.
«Аналіз шматлікіх выведных звестак паказвае, што Паўночная Карэя рыхтуецца да ратацыі альбо павелічэння колькасці войскаў, размешчаных у Расеі», ‒ адзначаецца ў заяве Аб'яднанага камітэту начальнікаў штабоў Паўднёвай Карэі, якую цытуе паўднёвакарэйскае агенцтва «Yonhap».
Раней паўднёвакарэйская выведка ацаніла страты паўночнакарэйскіх вайскоўцаў у вайне прыблізна на 1100 чалавек, з якіх 100 загінулі, а астатнія атрымалі раненні.
Ёсць прыкметы і таго, што Паўночная Карэя пераходзіць да вытворчасці і даставы дронаў-камікадзэ. Пра іх упершыню стала вядома падчас інспекцыі Кім Чэн Ына ў лістападзе, падкрэсліваюць у камітэце.
Паўночнакарэйскія медыі раней паведамлялі, што ў лістападзе Кім Чэн Ын асабіста назіраў за выпрабаваннямі розных тыпаў дронаў і заклікаў да іх масавай вытворчасці.
Нагадаем, што звесткі пра рыхтаванне паўночнакарэйскіх вайскоўцаў да ўдзелу ў вайне супраць Украіны з’явіліся ў кастрычніку гэтага года. Тады вялося пра тое, што КНДР скіравала блізу 11 тысячаў чалавек, з якіх 2,6 тысячы мусілі адправіцца ў Курскую вобласць.
У сярэдзіне снежня Уладзімір Зяленскі заявіў, што расейскае камандаванне пачало выкарыстоўваць паўночнакарэйскіх жаўнераў у баявых дзеяннях падчас штурмаў. У распараджэнні ўкраінскага боку нават меліся звесткі пра першыя страты сярод вайскоўцаў Паўночнай Карэі.
Раман Шавель belsat.eu
