На заканчэнне 2024 года «Белсат» вырашыў падвесці і музычныя вынікі, абраўшы найлепшых беларускіх выканаўцаў, песні, альбомы, кліпы і адкрыццё году. Дапамагчы нам у гэтым пагадзіліся пяць музычных экспертаў.
Па дапамогу ў складанні музычных топаў мы звярнуліся да самых розных музычных экспертаў. У склад нашага журы ўвайшлі (паводле алфавіту) музычная журналістка Алёна Варанец, сузаснавальнікі музычнага праекту «КЛІК» Мікіта Вектар і Аліна Мазавец, аматар беларускай музыкі Вячаслаў Радзівонаў і аўтар YouTube-каналу «Міністэрства сепультуры» Аляксандр Чарнуха.
Кожны з іх склаў свой топ-5 у пяці намінацыях: Найлепшы гурт або выканаўца, Найлепшы альбом, Найлепшая кампазіцыя, Найлепшы кліп і Адкрыццё года. Кожны намінант рэйтынгу атрымаў у выніку пэўную колькасць балаў, і пасля іх падсумавання былі вызначаныя пераможцы.
Найлепшы гурт або выканаўца
Пераможцам у гэтай намінацыі стаў гурт «Петля пристрастия», які сумарна набраў 19 балаў. На другім месцы – «Molchat Doma» і 18 балаў. На трэцяй пазіцыі «Naviband», які набраў 7 балаў.
Сярод намінантаў таксама былі «Сны синей собаки», «Swada & Niczos», Anastasia Rydlevskaya, «Ralla», Макс Корж, «Passive Voice», «Wasssup», «saypink!», «Dymna Lotva» і «СОЮЗ».
Найлепшы альбом
У гэтай намінацыі зноў перамог гурт «Петля пристрастия» са сваім першым беларускамоўным альбомам «Суперпазіцыя». Ён набраў 20 балаў ад нашага журы. Другое месца з 16 баламі зноў у гурта «Molchat Doma» за альбом «Belaya Polosa». Трэцяе месца ў падляскіх беларусаў «Sw@da x Niczos» за альбом «#INDAWOODS».
Таксама ў лік намінантаў увайшлі:
nkeei, uniqe, Artem SHILOVETS – «Glamour»
«Мутнаевока» – «Антыдэпрэсанты»
«Aum!» & «Autonomicon» – «Bestiarium»
«Fantastic Swimmers» – «Epistaxis»
Voskresenskii – «Broke Lives Matters»
ЗАО «Сомнительные инициативы» – «Подвал турнирной таблицы»
Найлепшая кампазіцыя
У якасці найлепшай кампазіцыі журы абрала песню «Квант» гурта «Петля пристрастия» – 13 балаў. Другое месца заняла Anastasia Rydlevskaya з песняй «Dance on my own» (10 балаў). Трэція ў рэйтынгу «Molchat Doma» з песняй «Belaya Polosa».
Таксама намінаванымі былі:
nkeei, uniqe, Artem SHILOVETS, Glamour – «Glamour»
«Бачу Упершыню» – «Планы на лета»
«Сны Синей Собаки» × ЗАО «Сомнительные инициативы» – «Стрелы громоотводов»
«Aum!» & «Autonomicon» – «Кахаць»
«Passive Voice» – «Моя любовь»
«Sw@da x Niczos» – «Chadžu Ja»
«WASSSUP» – «Билет на самолет»
«Мутнаевока» – «Цесна ў нябёсах»
Найлепшы кліп
Найлепшым беларускім музычным відэа 2024 года прызнаны кліп «Dance on my own» ад Anastasiya Rydlevskaya – у яго 21 бал. Другое месца ў відэа на песню «Крутой» ад гурта «Сны синей собаки» – 17 балаў. Трэцяе месца падзялілі «Петля пристрастия» і Iva Sativa з кліпамі на песні «Штосьці добрае» і «Kanapel» адпаведна. Яны набралі па 7 балаў.
Таксама сярод намінантаў былі:
«Applepicker» – «Hangin’ Around»
«Sw@da x Niczos» – «Chadžu Ja»
«Molchat Doma» – «Belaya Polosa»
«Sw@da × Niczos» – «Uzory Vyšyvat’»
Адкрыццё года
Завяршае наш музычны рэйтынг намінацыя «Адкрыццё года». Яе выйгралі падляскія беларусы «Sw@da x Niczos», якія набралі 14 балаў. Другое месца ўзяў жаночы фольк-дуэт «Ralla» (11 балаў), а трэцяе – у этна-эмбіент праекту «Parus», які атрымаў 9 балаў.
Таксама сярод намінантаў былі «Лайтовы», «Masha», «Аум!», «Twigs Garden», «Voskeresnski», «WASSSUP», «Znich», «Passive Voice», «Vihilija», ЗАО «Сомнительные инициативы», «VVaxplay» і «wtbsk».
Макар Мыш belsat.eu
