За падзеямі, што ўплываюць на жыццё беларусаў, выклікаюць шырокі рэзананс у грамадстве ці проста маюць вялікае значэнне тут і цяпер, разам з «Белсатам» сочыць мастак Дэ Лёс.
Бульбы засталося на два дні
Беларускі ўрад на тры месяцы ўвёў ліцэнзаванне вывазу бульбы за мяжу. Мэта гэтага – забеспячыць у поўным аб'ёме ў міжсезонны перыяд унутраны рынак сельскагаспадарчай прадукцыяй. Ліцэнзіі на вываз будзе выдаваць МАРГ на падставе ўзгаднення з Мінсельгасхарчам, аблвыканкамамі і Менскім гарвыканкамам. Пастанова аб магчымасці выдачы такой ліцэнзіі будзе прымацца, зыходзячы з ацэнкі суадносінаў свабодных рэсурсаў бульбы ў Беларусі і патрэбы краіны ў ёй на момант узгаднення ліцэнзіі.
Прычыны такіх пастановаў тлумачыць нядаўняя інфармацыя ад «BELPOL». У распараджэнні арганізацыі апынуліся дакументы, якія сведчаць пра тое, што ў беларускіх крамах не хапае не толькі бульбы, але і іншай гародніны.
Запасаў бульбы на складах – на два дні, капусты – на дзень, морквы – на 6 дзён. З такімі скаргамі скіроўвала ліст у Міністэрства гандлю гандлёвая сетка «Санта».
Іншая гандлёвая сетка – «Грын» – паведамляла: айчынных яблыкаў на іх складах увогуле няма. Складана і з іншай гароднінаю: бульбаю крама забяспечаная толькі на 30 % ад штомесячных патрэбаў. Рэтэйлер адзначаў: агульны аб’ём паставак беларускай гародніны цягам года абрынуўся з 80 да 12 %.
Дзяржаўныя сельгаспрадпрыемствы кампенсаваць недахопу не могуць – ураджайнасць не дазваляе. Закрытыя дакументы Белстату сведчаць: сёлета ў Віцебскай вобласці з гектара сабралі бульбы на 97 цэнтнераў менш, чым летась. Амаль на 40 % зменшыўся збор гэтых караняплодаў у Гарадзенскай вобласці. Адначасова цягам года пастаўкі бульбы з Расеі ў нашую краіну павялічыліся на 26,78 % – са 188 тысяч тонаў да 238 тысяч тонаў.
Акторы-«экстрэмісты»
Міністэрства ўнутраных справаў Беларусі прызнала арганізацыю «Вольныя Купалаўцы» «экстрэмісцкім фармаваннем» «за арганізацыю дзейнасці ў рыхтаванні здзяйснення замахаў на суверэнітэт і грамадскую бяспеку Рэспублікі Беларусь, дыскрэдытацыю і абразу службовых асобаў». МУС таксама забараніў дзейнасць «Вольных Купалаўцаў» на ўсіх інтэрнэт-платформах.
«Вольныя Купалаўцы» – аб’яднанне былых актораў Нацыянальнага акадэмічнага тэатру імя Янкі Купалы, што на знак нязгоды з гвалтам, учыненым рэжымам у 2020 годзе, амаль усім складам звольніліся. Сёння частка з іх вымушаная працаваць у выгнанні.
Злачынцы ў мантыях
Санкцыйны спіс Еўразвязу папоўніўся шэрагам прозвішчаў беларускіх суддзяў, якія выносілі палітычна матываваныя выракі.
Гэта сталася вынікам высілкаў каманды Народнага антыкрызіснага ўпраўлення (НАУ), што 11 кастрычніка 2024 года перадало ў Еўрапейскую службу вонкавапалітычнай дзейнасці прапановы з доказамі і падрабязным абгрунтаваннем для пашырэння санкцыйнага спісу ЕЗ. Адбыўся таксама шэраг сустрэчаў у структурах ЕЗ у Бруселі, каб прасоўваць гэтыя прапановы. Рада Еўразвязу пасля юрыдычнай экспертызы ўхваліла санкцыі.
Доказы, сабраныя камандай НАУ, не толькі былі падставаю для забароны названым суддзям уязджаць у ЕЗ, але і ўвойдуць у будучыні ў іхныя крымінальныя справы.
Акрамя таго, у санкцыйны спіс ЕЗ на прапанову НАУ ўнесеныя працаўнікі пенітэнцыярных установаў Беларусі.
,,«Пашырэнне санкцыйных спісаў – важнае сведчанне таго, што голас беларусаў чуюць у ЕЗ. […] Усім злачынцам у мантыях і форме варта памятаць: адказнасць – непазбежная», – перакананы намеснік Святланы Ціханоўскай у Аб'яднаным пераходным кабінеце, кіраўнік НАУ Павел Латушка.
Долар «скача»
У лістападзе курсы амерыканскай і еўрапейскай валютаў прымусілі здрыгануцца: долар вырас да 3,5951 рубля, еўра – да 3,7873 рубля. Гэта рэкордны для апошніх гадоў узровень. Пазней амерыканская і еўрапейская валюты «займелі сумленне» і крыху адкаціліся. Станам на 19 снежня долар каштаваў 3,472 рубля, а еўра – 3,6451 рубля.
Надоечы Еўразійскі банк развіцця ў сваім макраэканамічным прагнозе напісаў, што налета сярэдні курс долара ў Беларусі складзе 3,38 рубля. На нацыянальную валюту будзе ціснуць дэфіцыт вонкавага гандлю, які, падобна, будзе павялічвацца. Як пісаў «Белсат», за дзесяць месяцаў Беларусь купіла імпартных тавараў і паслугаў на $ 314,7 млн болей, чымся прадала за мяжу.
Ялінкі «лятаюць»
У Беларусі і суседніх краінах 16 снежня моцны вецер выклікаў сапраўдны «ялінкапад».
Вядома пра паваленыя святочныя дрэвы ў Заслаўі і Горадні. У Заслаўі ўпала ялінка на Рынкавай плошчы. У Горадні тры ялінкі: на вуліцы Паповіча, у мікрараёнах Вішнявец-4 і Грандзічы.
Міністэрства надзвычайных сітуацыяў паведаміла, што пацярпелі 54 паселішчы, з іх 34 – на Берасцейшчыне. Пашкоджаныя дахі 21 жылога дому, адной гаспадарчай пабудовы, аднаго аб’екту сацкультбыту і 79 сельскагаспадарчых будынкаў.
«Ялінкапад» адбыўся і ў Літве: паведамленні пра паваленыя калядныя дрэвы прыйшлі з розных рэгіёнаў краіны, у тым ліку з Ковенскага і Клайпедскага. У горадзе Гаргждай Клайпедскага раёну ялінка не ўпала, а зламалася. У самой Клайпедзе былі пашкоджаныя святочныя інсталяцыі. Парывы ветру там дасягалі 31 м/с. Пра паваленую ветрам ялінку паведамлялі таксама польскія медыі: адбылося гэта ў паселішчы Касьцежына ў Лодзінскім ваяводстве.
Дэ Лёс belsat.eu
