«Кіберпартызаны» атрымалі доступ да базаў з інфармацыяй пра памерлых у Беларусі, у тым ліку да дакументаў з афіцыйнаю прычынаю смерці.
Сярод іншых, у базе знайшліся звесткі пра гучныя смерці вядомых асобаў.
У якасці прычыны гібелі Андрэя Зельцара, застрэленага супрацоўнікам КДБ 28 верасня 2021 года, пазначаная «адкрытая рана пярэдняй сценкі грудной клеткі». А прычына смерці супрацоўніка КДБ Дзмітрыя Федасюка, які таксама загінуў у той перастрэлцы на вул. Якубоўскага, – «іншыя ўдакладненыя траўмы з закрананнем некалькіх вобласцяў цела».
Смерць Вітольда Ашурка ў Шклоўскай калоніі, згодна з афіцыйнай інфармацыяй, выклікалі «іншыя недакладна вызначаныя і неўдакладненыя прычыны смерці». Тое самае – ва Уладзіміра Макея, які памёр у лістападзе 2022 года. Ягоная раптоўная смерць тады спарадзіла шмат канспіралагічных тэорыяў, падазравалі нават забойства.
Аляксандр Тарайкоўскі, забіты стрэлам каля станцыі метро «Пушкінская» 10 жніўня 2020 года, памёр ад «адкрытай раны пярэдняй сценкі грудной клеткі». Генадзь Шутаў, у якога таксама стралялі сілавікі, – ад «ачаговай траўмы галаўных мазгоў».
«Кіберпартызаны» абяцаюць неўзабаве апублікаваць статыстыку смяротнасці і нараджальнасці ў Беларусі.
Марыя Міхалевіч belsat.eu
