КДБ Беларусі 19 снежня дадаў заснавальніка сеткі медычных цэнтраў «Новы зрок» Алега Каўрыгіна ў «пералік арганізацыяў і фізічных асобаў, датычных да тэрарыстычнай дзейнасці».
Разам з Каўрыгіным у «тэрарыстычны спіс» дадалі яшчэ восем асобаў.
25 лістапада 2024 года заснавальніка «Новага зроку» завочна прысудзілі да 12 гадоў пазбаўлення волі паводле дзесяці артыкулаў Крымінальнага кодэксу Беларусі.
Бізнесоўца прызналі вінаватым у арганізацыі ўхілення ад выканання абавязкаў падаткавага агента па пералічэнні падаткаў, якое выклікала прычыненне ўрону ў асабліва буйным памеры, а таксама ў арганізацыі ўхілення ад выплаты страхавых узносаў, якое выклікала прычыненне ўрону ў асабліва буйным памеры.
Каўрыгін у інтэрв'ю «Белсату» казаў, што лічыць прысуд «папярэджаннем іншым бізнесоўцам, іншым сумленным людзям, каб яны сядзелі ўдома, каб яны не адкрывалі рота».
Абскарджваць прысуд Алег Каўрыгін не збіраецца: кажа, фізічна не можа гэтага зрабіць, бо не мае магчымасці нават атрымаць з суда тэкст выраку.
Марыя Міхалевіч belsat.eu
