Ад Беларусі і Расеі дапусцяць па адным спартоўцы ў кожным відзе праграмы ў мастацкім коўзанні, канькабежным спорце і шорт-трэку. Будуць правяраць, што спартоўцы гаварылі пра вайну ва Украіне.
Міжнароднае аб’яднанне канькабежцаў (ISU) 20 снежня пастанавіла дапусціць да кваліфікацыі на Алімпійскія гульні ў сезоне 2025–2026 гадоў абмежаваную колькасць «індывідуальных нейтральных атлетаў» з Беларусі і Расеі.
ISU паведаміла, што ўважліва вывучыла рэкамендацыі Міжнароднага алімпійскага камітэту і адзначыла мірны ўдзел нейтральных спартоўцаў на летніх Алімпійскіх гульнях у Парыжы ў 2024 годзе, таму пастанавіла дапусціць у нейтральным статусе атлетаў з беларускага і расейскага Саюзаў канькабежцаў да адбору на Алімпійскія гульні 2026 года, якія маюць прайсці ў італьянскіх Мілане і Картыне-д’Ампэцца.
Дапусцяць да адбору толькі па адным нейтральным атлеце з Беларусі і Расеі ў кожнай з дысцыплінаў, не дапусцяць да адбору каманды з Беларусі і Расеі.
Першы адбор пройдзе 17–21 верасня 2025 года ў Пекіне, спаборнічаць будуць фігурысты. У кастрычніку–лістападзе пройдуць адборы ў шорт-трэку, у лістападзе–снежні – у класічных гонках.
Беларускім канькабежцам і фігурыстам не надта шчасціць на Алімпіядах, медалі найчасцей прыносяць беларускія біятланісты і лыжнікі-фрыстайлісты. З канькабежцаў першы і апошні раз медаль для Беларусі прывёз у 1994 годзе Ігар Жалязоўскі: гэта было срэбра на дыстанцыі 1000 м.
Алесь Наваборскі belsat.eu
