Былы міліцыянт памёр праз год з нечым пасля выхаду на пенсію. Прычыны смерці не паведамляюцца. Гэта чарговая смерць адносна маладога сілавіка – частата такіх навінаў выглядае дзіўна.
На 50-м годзе жыцця памёр падпалкоўнік міліцыі Павел Гавін, які больш за 10 гадоў быў намеснікам начальніка Салігорскага РАУС у пытаннях ідэалогіі і кадравай працы, піша «Наша Ніва» са спасылкай на міліцэйскую газету «На страже».
Прычынаў смерці не называюць. Гавін выйшаў на пенсію ў жніўні 2023 года, меў медалі «За бездакорную службу» III ступені і «За адзнаку ў ахове грамадскага парадку». У адкрытых крыніцах не ўдалося знайсці звестак пра ўдзел Гавіна ў палітычных рэпрэсіях.
Гэта далёка не першая смерць адносна маладога сілавіка. Альянс расследавальнікаў Беларусі вывучыў унутраныя дакументы МУС і выявіў, што з 2020 года з розных прычынаў пайшлі з жыцця як мінімум некалькі дзясяткаў сілавікоў розных чыноў і рангаў. Частка выпадкаў выглядае дзіўна. Прычыны розныя: COVID, праблемы з сэрцам, інфаркты, самагубствы, няшчасныя выпадкі… Сярод памерлых дамінуюць супрацоўнікі Дэпартаменту аховы Міністэрства ўнутраных справаў.
Алесь Наваборскі belsat.eu
