Тралейбусы новага пакалення ад МАЗ ужо з’явіліся ў Менску, а да канца 2024 года маюць з’явіцца і ў Гомлі.
Менскі аўтазавод паведаміў, што першы новы тралейбус МАЗ-303Т дастаўся менскаму тралейбуснаму парку № 5 і прайшоў абкатку на праспекце Незалежнасці 17 снежня.
«Менсктранс» пазней пацвердзіў гэта і расказаў, што плануе атрымаць агулам 50 такіх тралейбусаў. Новы МАЗ-303Т ужо ездзіць на маршруце № 50 (бартавы нумар 5071) з Лошыцы на Аўтазаводскую. Паводле МАЗ, да канца года такі тралейбус мае з’явіцца і ў Гомлі.
МАЗ-303Т – тралейбус на базе аўтобуса МАЗ-303. У адрозненне ад аўтобуса, тралейбусы і электробусы на базе гэтай мадэлі не маюць вялікага маторнага адсеку, які займаў бы прастору ў салоне, таму ў ім больш месца для пасажыраў. Тралейбус мае запас аўтаномнага руху, можа праехаць участак «без рогаў», то бок без падключэння да кантактнай сеткі.
Гэта не першыя тралейбусы, якія могуць ездзіць «без рогаў»: з 2019 года ў Менску пачалі выкарыстоўваць тралейбусы МАЗ-203Т, а пазней – тралейбусы БКМ-32100D ад «Белкамунмашу», якія таксама маюць запас аўтаномнага руху.
Паведамлялі таксама, што 39 новых тралейбусаў МАЗ-303Т выправілі ў расейскую Казань. У Расеі тэхніцы МАЗ не шчасціць: яна там рэгулярна гарыць. Чыноўнікі гэта звязваюць з «умовамі санкцыйнага ціску і парушэннем лагістычных ланцужкоў». Праблему ўскосна прызнаў Аляксандр Лукашэнка, які на сустрэчы з губернатарам Краснадарскага краю 19 верасня 2023 года заявіў, што прычына ўзгаранняў іншая: адсутнасць «якаснага і своечасовага абслугоўвання».
Алесь Наваборскі belsat.eu
